Álemdik naryqta munai baǵasy osymen úshinshi kún qatarynan tómendep jatyr. Keshe AQSh Energetika ministrliginiń osy aptada jariialaǵan baiandamasynan keiin álemdik naryqtaǵy munai baǵasy taǵy da quldyrai jóneldi. London ICE birjasynda Brent markasynyń mamyr fiýchersteriniń bir barreliniń quny 5 naýryzda keshkisin 68,76 dollardy qurap, taǵy 3,21%-ǵa qunsyzdandy, dep jazady Dalanews.kz.
Niý-Iork taýarlyq birjasynyń saýda-sattyǵy barysynda (NYMEX) WTI munaiynyń sáýir fiýchersteri 3,84%-ǵa arzandap, bir barreliniń baǵasy 65,64 dollarǵa deiin tómendedi.
"AQSh-tyń kommertsiialyq munai qory ótken aptada 3,614 mln barrelge ústemelenip, 433,775 mln barreldy qurady. AQSh-tyń Energetika ministrligi dál osyndai tsifrlardy jariialady. Al Trading Economics málimetinshe, sarapshylar ary ketse AQSh-tyń munaiy qory 900 myń barrelge ósedi dep boljaǵan edi. Al naqtysynda, bul kútilgen boljamnan asyp ketip otyr", dep jazady Qazaqstan qarjygerleri qaýymdastyǵy.
Iá, munai baǵasy úshinshi kún qatarynan tómendep jatqan jaiy bar.
"Munai baǵasy AQSh prezidenti Donald Tramp bastamashy bolǵan saýda soǵysy, sondai-aq OPEK+ elderiniń munai óndirisi kólemin birtindep arttyrý týraly jariialanǵan josparlary aiasynda jarty jyl boiyndaǵy eń tómengi shekti igerdi. Brent 2,4%-ǵa arzandap, bir barreliniń quny 69 dollar, al WTI quny 2,9%-ǵa quldyrap, baǵasy 66 dollar boldy. Osylaisha bir kúnniń barysynda Brent qysqamerzimde 2021 jylǵy jeltoqsanda tirkelgen eń tómengi deńgeidi qamtydy" jazady BBC Invest sarapshylary.
Bárinen buryn, bul jańalyqqa Resei tarapy qýanyp, eki alaqanyn ysqylap otyr.
"Arzan munai Resei biýdjetine qaýip tóndiredi, biraq eksport kólemin ulǵaitý turǵysynda perspektiva ashylady, óitkeni Urals belgilengen baǵadan da tómen satylýy múmkin, sáikesinshe arǵy jaǵynda sanktsiialardan da shyǵamyz", - deidi reseilik sarapshy Maksim Hýdalov Forbes.ru-ǵa bergen suqbatynda.
Onyń aitýynsha, Brent baǵasynyń tómendeýi batystyq sanktsiialarǵa súienetin kompaniialardyń ózin Resei munaiyn tasymaldaýǵa múmkindik beredi, óitkeni jeńildikterdi eskersek, bul olarǵa belgilengen shek 60 dollardan da tómen baǵada arzanǵa túsedi. "Sondyqtan reseilik munai tasymaly alda ýaqytsha ósýi múmkin", — deidi Hýdalov.
Reseidiń Alfa-bank ókili Nikita Blohin de AQSh arzan munai sata almaitynyn aitady. Iran da, Venesýela da aýyr munai óndirisi, salyqtardy qosa eseptegende tómen baǵaǵa daiyn emes.
"Al Resei sanktsiialardan basyn arshý úshin Urals munaiyn jetkizýge daiyn. Sondyqtan bul quldyraý Resei úshin tiimdi", - deidi ol.
Buǵan deiin saitymyzda "Tramp Meksika, Kanada jáne QHR taýarlaryna baj salamyn dep, munai baǵasyn "qulatty" degen maqala jariialanǵan bolatyn. Sondai-aq OPEK + elderi 1 sáýirden bastap munai óndirisin birtindep ulǵaita bastaityndaryn jazǵanbyz.
