Qazaqstanda 2025 jyly múgedektikke jáne asyraýshysynan aiyrylý jaǵdaiyna bailanysty memlekettik áleýmettik járdemaqylarǵa respýblikalyq biýdjetten 655,7 mlrd teńge baǵyttaldy, dep habarlaidy Dalanews.kz.
Buǵan qosa, Memlekettik áleýmettik saqtandyrý qorynan eńbekke qabilettiligin joǵaltý jáne asyraýshysynan aiyrylý boiynsha shamamen 90,3 mlrd teńge kóleminde áleýmettik tólemder jasaldy.
Jyl qorytyndysy boiynsha múgedektik boiynsha járdemaqy alýshylar sany 553,9 myń adamdy, al asyraýshysynan aiyrylý boiynsha shamamen 191,9 myń adamdy qurady.
Múgedektikke arnalǵan memlekettik járdemaqynyń mólsheri múgedektik tobyna, onyń sebebine jáne tiisti jylǵa belgilenetin kúnkóris minimýmyna bailanysty esepteledi. Al asyraýshysynan aiyrylý boiynsha tólemder marqumnyń asyraýynda bolǵan adamdar sanyna, qaitys bolý sebebine jáne kúnkóris deńgeiine qarai aiqyndalady.
Mindetti áleýmettik saqtandyrý júiesine qatysýshylar úshin qosymsha qoldaý qarastyrylǵan. 2025 jyly eńbekke qabilettiligin joǵaltqany úshin 101,3 myń adam, al asyraýshysynan aiyrylǵany úshin 68,6 myń otbasy Memlekettik áleýmettik saqtandyrý qorynan tólem aldy. Bul qarajat respýblikalyq biýdjetten beriletin járdemaqylarǵa qosymsha retinde tólenedi.
2026 jyldyń 1 qańtarynan bastap múgedektikke jáne asyraýshysynan aiyrylýǵa bailanysty memlekettik járdemaqylar 10 % ósedi. Bul kúnkóris minimýmynyń ulǵaiýymen bailanysty. Úkimet sheshimimen Memlekettik áleýmettik saqtandyrý qorynan tólenetin áleýmettik tólemder de 10 % arttyryldy.
Biyl múgedektik boiynsha járdemaqy mólsheri jalpy aýrýǵa bailanysty:
•1-top úshin 111 872 teńge
•2-top úshin 89 498 teńge
•3-top úshin 61 021 teńge
Al 2026 jylǵy 1 qańtardaǵy derekke sáikes, eńbekke qabilettiligin joǵaltý boiynsha ortasha áleýmettik tólem 72 409 teńgeni, asyraýshysynan aiyrylý boiynsha 73 306 teńgeni quraidy.
Bul ózgerister áleýmettik osal sanattaǵy azamattardyń tabysyn arttyryp, olardyń ómir sapasyn jaqsartýǵa baǵyttalǵan.
