Túrkistan oblysynda 100 myńǵa jýyq múmkindigi shekteýli jan turady. Bul oblys halqynyń 5%-yn quraidy. Onyń 40 myńnan astamy áleýmettik ońaltý qyzmetine muqtaj. Bul másele oblys basshylyǵynyń qoldaýymen sheshimin taýyp keledi, – dep habarlaidy Dalanews.kz Túrkistan oblysy ákiminiń baspasóz qyzmetine silteme jasap.
Búgin Saýran aýdanynda 25 qazan – Respýblika kúnine orai 200 oryndyq zamanaýi ońaltý ortalyǵy ashyldy. Ashylý saltanatyna oblys ákimi Darhan Satybaldy, maslihat depýtattary, ziialy qaýym ókilderi men ardagerler, sonymen qatar Saýran aýdany men Kentaý jáne Túrkistan qalasynyń turǵyndary qatysty.
– Sizderdi Respýblika kúnimen shyn júrekten quttyqtaimyn! Osyndai mańyzdy mereke qarsańynda Túrkistan oblysynda birqatar áleýmettik nysandar el igiligine paidalanýǵa tapsyrylyp jatyr. Al búgin jańa «Samǵaý» ońaltý ortalyǵyn ashqaly otyrmyz. Memleket basshysy «Múgedektigi bar azamattarǵa júieli qoldaý kórsetý progressivti jáne áleýmettik jaýapty memleketterge tán. Biz bul baǵyttaǵy jumysymyzdy únemi jetildirip otyrýymyz kerek» degen bolatyn. Ómirdiń árbir synaǵy bizdi shyńdai túsedi. Árbir adam – óz ómiriniń batyry! Kedergini emes, múmkindikti izdegen azamat maqsatyna jetedi. Ortalyqqa keletin árbár janǵa em-dom bolady degen senimdemin, qabyl alyńyzdar! – dedi oblys ákimi.
Qonaqtar da óz kezeginde «Samǵaý» ońaltý ortalyǵyn «izgilik pen meiirimdiliktiń ordasyna», «qamqorlyq pen janashyrlyq ortalyǵyna», «júrekterge jylýlyq pen úmit syilaityn mekenge» teńedi. Bul jer – tek fizikalyq túrde qalpyna keltirýge ǵana emes, rýhani kúsh-jiger jinaýǵa, jańa múmkindikterge jol ashýǵa baǵyttalǵanyn tilge tiek etti. Sodan soń ortalyqtyń lentasy qiylyp, kelýshiler «Samǵaý» ońaltý ortalyǵynyń ǵimaratymen tanysty.
Oranǵai aýylynda ornalasqan ortalyqta 18 jastan asqan múgedektigi bar adamdarǵa arnalǵan. Ońaltý ortalyǵynyń qurylysy 2021 jyly bastalyp, 2024 jyly aiaqtalady. Jobanyń quny 2,5 milliard teńgeni quraidy. Ǵimarattyń jalpy aýdany 12,8 myń sharshy metrdi quraidy. «Túrkistan oblysynyń áleýmettik-ekonomikalyq damýynyń 2021-2025 jyldarǵa arnalǵan keshendi josparyna» sáikes qurylysy júrgizildi. Qazirgi tańda jartylai statsionarlyq úlgide «№6 arnaýly áleýmettik qyzmetter kórsetý ortalyǵy» kommýnaldyq memlekettik mekemesi («Samǵaý» ońaltý ortalyǵy) quryldy.
Ortalyq zamanaýi ońaltý quraldarymen jabdyqtalǵan. Deneni qalpyna keltirý jáne stress pen psihosomatikalyq aýrýlardy jeńýge arnalǵan relaksatsiianyń keshendi protsedýralaryn usynady. Jartylai statsionarlyq ońaltý ortalyǵynyń qyzmeti arnaýly áleýmettik kómekke muqtaj adamdarǵa 6 aiǵa deiingi merzimge arnaýly áleýmettik qyzmetter kórsetýge baǵyttalǵan. Munda qoldanystaǵy standartqa sáikes kepildik berilgen arnaýly áleýmettik qyzmetterdiń 8 túrin kórsetedi.
