تۇركىستان وبلىسىندا 100 مىڭعا جۋىق مۇمكىندىگى شەكتەۋلى جان تۇرادى. بۇل وبلىس حالقىنىڭ 5%-ىن قۇرايدى. ونىڭ 40 مىڭنان استامى الەۋمەتتىك وڭالتۋ قىزمەتىنە مۇقتاج. بۇل ماسەلە وبلىس باسشىلىعىنىڭ قولداۋىمەن شەشىمىن تاۋىپ كەلەدى، – دەپ حابارلايدى Dalanews.kz تۇركىستان وبلىسى اكىمىنىڭ باسپا ءسوز قىزمەتىنە سىلتەمە جاساپ.
بۇگىن ساۋران اۋدانىندا 25 قازان – رەسپۋبليكا كۇنىنە وراي 200 ورىندىق زاماناۋي وڭالتۋ ورتالىعى اشىلدى. اشىلۋ سالتاناتىنا وبلىس اكىمى دارحان ساتىبالدى، ماسليحات دەپۋتاتتارى، زيالى قاۋىم وكىلدەرى مەن ارداگەرلەر، سونىمەن قاتار ساۋران اۋدانى مەن كەنتاۋ جانە تۇركىستان قالاسىنىڭ تۇرعىندارى قاتىستى.
– سىزدەردى رەسپۋبليكا كۇنىمەن شىن جۇرەكتەن قۇتتىقتايمىن! وسىنداي ماڭىزدى مەرەكە قارساڭىندا تۇركىستان وبلىسىندا ءبىرقاتار الەۋمەتتىك نىساندار ەل يگىلىگىنە پايدالانۋعا تاپسىرىلىپ جاتىر. ال بۇگىن جاڭا «سامعاۋ» وڭالتۋ ورتالىعىن اشقالى وتىرمىز. مەملەكەت باسشىسى «مۇگەدەكتىگى بار ازاماتتارعا جۇيەلى قولداۋ كورسەتۋ پروگرەسسيۆتى جانە الەۋمەتتىك جاۋاپتى مەملەكەتتەرگە ءتان. ءبىز بۇل باعىتتاعى جۇمىسىمىزدى ۇنەمى جەتىلدىرىپ وتىرۋىمىز كەرەك» دەگەن بولاتىن. ءومىردىڭ ءاربىر سىناعى ءبىزدى شىڭداي تۇسەدى. ءاربىر ادام – ءوز ءومىرىنىڭ باتىرى! كەدەرگىنى ەمەس، مۇمكىندىكتى ىزدەگەن ازامات ماقساتىنا جەتەدى. ورتالىققا كەلەتىن ءاربار جانعا ەم-دوم بولادى دەگەن سەنىمدەمىن، قابىل الىڭىزدار! – دەدى وبلىس اكىمى.
قوناقتار دا ءوز كەزەگىندە «سامعاۋ» وڭالتۋ ورتالىعىن «ىزگىلىك پەن مەيىرىمدىلىكتىڭ ورداسىنا»، «قامقورلىق پەن جاناشىرلىق ورتالىعىنا»، «جۇرەكتەرگە جىلۋلىق پەن ءۇمىت سىيلايتىن مەكەنگە» تەڭەدى. بۇل جەر – تەك فيزيكالىق تۇردە قالپىنا كەلتىرۋگە عانا ەمەس، رۋحاني كۇش-جىگەر جيناۋعا، جاڭا مۇمكىندىكتەرگە جول اشۋعا باعىتتالعانىن تىلگە تيەك ەتتى. سودان سوڭ ورتالىقتىڭ لەنتاسى قيىلىپ، كەلۋشىلەر «سامعاۋ» وڭالتۋ ورتالىعىنىڭ عيماراتىمەن تانىستى.
ورانعاي اۋىلىندا ورنالاسقان ورتالىقتا 18 جاستان اسقان مۇگەدەكتىگى بار ادامدارعا ارنالعان. وڭالتۋ ورتالىعىنىڭ قۇرىلىسى 2021 جىلى باستالىپ، 2024 جىلى اياقتالادى. جوبانىڭ قۇنى 2،5 ميلليارد تەڭگەنى قۇرايدى. عيماراتتىڭ جالپى اۋدانى 12،8 مىڭ شارشى مەتردى قۇرايدى. «تۇركىستان وبلىسىنىڭ الەۋمەتتىك-ەكونوميكالىق دامۋىنىڭ 2021-2025 جىلدارعا ارنالعان كەشەندى جوسپارىنا» سايكەس قۇرىلىسى جۇرگىزىلدى. قازىرگى تاڭدا جارتىلاي ستاسيونارلىق ۇلگىدە «№6 ارناۋلى الەۋمەتتىك قىزمەتتەر كورسەتۋ ورتالىعى» كوممۋنالدىق مەملەكەتتىك مەكەمەسى («سامعاۋ» وڭالتۋ ورتالىعى) قۇرىلدى.
ورتالىق زاماناۋي وڭالتۋ قۇرالدارىمەن جابدىقتالعان. دەنەنى قالپىنا كەلتىرۋ جانە سترەسس پەن پسيحوسوماتيكالىق اۋرۋلاردى جەڭۋگە ارنالعان رەلاكساسيانىڭ كەشەندى پروسەدۋرالارىن ۇسىنادى. جارتىلاي ستاسيونارلىق وڭالتۋ ورتالىعىنىڭ قىزمەتى ارناۋلى الەۋمەتتىك كومەككە مۇقتاج ادامدارعا 6 ايعا دەيىنگى مەرزىمگە ارناۋلى الەۋمەتتىك قىزمەتتەر كورسەتۋگە باعىتتالعان. مۇندا قولدانىستاعى ستاندارتقا سايكەس كەپىلدىك بەرىلگەن ارناۋلى الەۋمەتتىك قىزمەتتەردىڭ 8 ءتۇرىن كورسەتەدى.
ايتا كەتەيىك، جاڭا ورتالىق ءبىر ايدىڭ ىشىندە ءبىر مەزگىلدە 200 ادامعا وڭالتۋ قىزمەتىن كورسەتۋدى جوسپارلاپ وتىر. بۇل دەگەنىمىز جىل سايىن 2،5 مىڭعا جۋىق مۇگەدەكتىگى ازامات جىل بويىنا جوعارى ساپالى ارناۋلى الەۋمەتتىك قىزمەت الۋ مۇمكىندىگىنە يە بولادى. جالپى 180-گە جۋىق شتات ءبولىنىپ، وعان ىرگەلەس جاتقان 3 اۋدان، قالانىڭ تۇرعىندارى جۇمىسپەن قامتىلىپ وتىر. وبلىستىڭ بارلىق اۋدان، قالالارىندا مۇگەدەكتىگى بار ادامدارعا قىزمەت كورسەتۋ ءۇشىن «TEN QOGAM» ورتالىقتارى اشىلعان. «Amanat» پارتياسىنىڭ «حالىقپەن بىرگە» سايلاۋالدى باعدارلاماسىنا سايكەس 2021-2024 جىلدار ارالىعىندا 1426 نىسان بەيىمدەلدى.
