Qarjy ministri Mádi Takiev Májilis dálizinde salyq organdary azamattardyń mobildi aýdarymyna júrgizgen taldaý nátijesin aitty, dep habarlaidy dalanews.kz.
Onyń sózinshe, vedomstvo 10 bankpen birlesip, jeke tulǵalardyń aqsha aýdarymyn zerttegen. Tekseris qorytyndysy boiynsha úsh ai ishinde 100-den asa aýdarym alyp, jalpy somasy 1 mln 20 myń teńgeden asqan 115 myń adam anyqtalǵan. Dál osyndai operatsiialar salyq organdarynyń nazaryn aýdarǵan.
Jalpy aýdarym kólemi 1 trln teńgeden asqan. Sonyń ishinde shamamen 67 myń jeke tulǵanyń esepshotyna 670 mlrd teńge túskeni belgili bolǵan. Sondai-aq, 7 800 shetel azamatynyń da osyndai operatsiialarǵa qatysy bar ekeni anyqtalǵan.
Ministrdiń sózinshe, endi bul azamattardan túsken qarajat qaidan kelgeni jáne qandai maqsatqa paidalanylǵany jóninde túsinikteme suralady.
Mádi Takievtiń aitýynsha, maqsat - azamattardy jazalaý emes, aýdarymdardyń mán-jaiyn anyqtaý.
