Irilengen Maqtaaral aýdanynyń tusynda ortalyqtan jáne toǵyz joldyń torabynan shet qalýy – Myrzakent kentiniń damýyn tejegen. Búgingi tańda jańa aýdannyń ortalyǵy bolǵan kentti damytýdyń keshendi jospary ázirlený ústinde. Jospar boiynsha Dostyq kanalyndaǵy úlken kópir jóndelip, kanaldyń jaǵalaýy jańa keiipke enetin bolady. Jańaqurylys aýmaǵyna qosymsha transformatorlar, elektr jelilerin ornatý jáne kent aýmaǵyndaǵy transformatorlar men elektr jelilerin kúrdeli jóndeýden ótkizý josparlanýda. Amangeldi, Jambyl, T.Madihodjaev kóshelerine taza aýyz sý júieleri júrgiziledi. Sonymen qatar, kenttiń ishki kóshelerin asfaltteý, jaryqtandyrý jumystary burynǵyǵa qaraǵanda 2 ese artatyn bolady. Bul týraly Myrzakent kentiniń turǵyndarymen bolǵan kezdesýinde aýdan ákimi B.Asanov málimdedi.
Qazirgi tańda kentte 1 kooperativ, 11 JShS, 36 dúken, 15 kafe, 4 toihana, 2 bazar ǵana bar. Aýdan ortalyǵynda kásipkerlikti damytý úshin syrtqy jáne ishki investitsiiany tartý kózdelýde. Ol úshin aýdan boiynsha beldi kásipkerlerdiń basyn qosyp, jiyn ótkizetinin óńir basshysy atap ótti.
Munan soń aýdan ákimi B.Asanov turǵyndarynyń sany 20 myńǵa taiap qalǵan Atakent kentiniń máseleleli nysandarymen tanysty. Jańadan asfalt tóselgen kóshelerdi aralap kórip, kúrdeli jóndeýdi qajet etetin mektepterge bardy. Sondai-aq, atakenttiktermen de arnaiy jiyn ótkizip, turǵyndardy mazalap júrgen suraqtarǵa jaýap berdi.
«Biz Myrzakent pen Atakentti qatar damytatyn bolamyz. Ol úshin joba-josparlarymyz bar. Bir kezderi ataǵy Máskeýge jetip, qanshama jyldar boiy ekonomikalyq kórsetkishteri boiynsha oq boiy ozyp turǵan Maqtaaraldy qaitadan jasaqtaityn bolamyz» - dedi Baqyt Násirhanuly.
Maqtaaral aýdany ákiminiń baspasóz qyzmeti
