Meshitter janyndaǵy jazǵy mektepter jastardyń dini saýattylyǵyn kóterýde
Qazirgi tańda orta bilim berý mekemelerinde jas jetkinshekterdiń dini saýatyn kóterýge qatysty arnaiy sabaq júrgizilmeidi. Qazaqstan zaiyrly memleket bolǵandyqtan, mektepterde dini saýattylyq jónindegi sabaqtardyń engizilmegenin túsinýge bolady.
Baiaǵyda ata-ájelerimiz «baqilyq bolsaq, sońymyzdan Quran oqisyń» dep bala kezimizde bárimizge duǵa-súrelerdi jattatýshy edi. Qazirgi tańda jastardyń dini saýatyn ashýdaǵy alǵashqy álippesi internet bolyp tur. Ǵalamtorda kóńilge qonymdy dúnieni tabý qiyn. Internettiń aldynda saǵattap otyrǵanda destrýktivti aǵymdardyń tuzaǵyna túsip qalýyń ábden múmkin. Sondyqtan dini saýattylyǵyn kóterýge umtylǵan jastarǵa ǵalamtor shamshyraq bola almaidy.
Endi qaitpek kerek? Bul tyǵyryqtan shyǵatyn jol bar ma? Bar. Búginde elimizdegi barlyq eldi mekenderde meshitter bar. Dini saýattylyǵyn kóterýge, dinge qatysty qandai da bir suraqqa jaýap izdegen adam osy meshitte jurtqa baǵyt-baǵdar berip otyrǵan Qazaqstan musylmandary Dini basqarmasynyń ókili imamdarǵa kelip, keńes alyp, mazalaǵan suraqtaryn qoiýǵa bolady. Imam aldyna kelip keńes suraǵan adamǵa durys baǵytty nusqaityny anyq.
Bes ýaqyt namyz oqyp, saqalyn qoia berip kóshede júrgen adamnyń bári dindár dep aita almaisyń. Olardyń ne oiy bar ekenin eshkim de bilmeidi.
Dalanews.kz aqparattyq agenttigi jastardyń jat aǵymnyń jeteginde ketpeýi úshin ózderi turatyn aýmaqtaǵy meshittermen tyǵyz bailanys ornatýǵa keńes beredi. Meshittegi imamdar Mýftiiattyń sol jerdegi ókili. Olar ata-babamyz ustanǵan dástúrli dindi nasihattaýshy tulǵalar. Sondyqtan oiyńyzda dinge qatysty qandai da bir suraq týyndasa, imamdarmen aqyldasqan lázim. Osy rette jastardyń dini saýattylyǵyn arttyrýǵa qatysty kókeiimizdegi suraqty bilikti teolog maman Berdimurat Qasymovqa qoiǵanda, tómendegidei tushymdy jaýap aldyq.
– Búginde elimizde dinge bet burǵysy keletin jastar kóp. Biz úshin osy jastardyń jat aǵymdardyń arbaýyna túsip qalmaǵany kerek. Al ár aýdanda medrese ashyp, jastardyń dini saýattylyǵyn jetildiretin múmkinshilik joq. Biraq ár aýylda Dini basqarmaǵa tirkelgen meshitter jumys isteidi. Halyq arasynda dini aǵartýshylyqty arttyrý úshin osy meshitterdiń múmkinshiligin paidalanǵan abzal bolady. Qazir meshitterdiń janynan jastarǵa arnap jazǵy mektepter jumys isteidi. Aýyl-aimaqtaǵy balalar jazǵy demalysqa shyqqan kezderinde osy dini saýat ashý kýrstaryna qatysyp, ózderiniń dini saýattylyǵyn kóterýine bolady. Meshitter janynan uiymdastyrylǵan mundai saýat ashý kýrstarynda jas jetkinshekter Quran álippesi men ata-anany syilaý, eldi qadirleý, izet, ádep, qamqorlyq syndy adamzatqa tán qundylyqtar jaiynda qyzyqty dárister tyńdaidy. Eger osy jazǵy mektepterde dini saýattylyǵyn jetildirgen jastar odan ári dindi kásibi túrde meńgerýge ańsary aýsa 9-11 synyptan keiin medreselerge túsip, dini saýattylyǵyn arttyrýyna bolady, – deidi Berdimurat Qasymov myrza.
Mine, aǵaiyn, teolog mamannyń ózi de dini saýattylyǵyn arttyrýǵa ańsary aýǵan azamattarǵa meshitter janyndaǵy jazǵy mektepterde tanym-túsinigin kóterýdi usynyp otyr. Eger dini saýattylyǵyńyzdy kótergińiz kelse, meshitter janyndaǵy jazyǵy mektepterge jazylyp, dini saýattylyqty kótergen durys. Qazirgidei zamanda árbir azamattyń dini saýatty bolýy qoǵam úshin mańyzdy. Dini saýattylyǵyn kótergen adam din mamany bolyp ketpeidi. Dini saýattylyq destrýktivti aǵymdarǵa qarsy immýnitetti qalyptastyratynyn umytpaiyq.
Anar SABYROVA
