Dúkenge kirip-shyǵyp jatqan jurt oǵan nazar da aýdarǵan joq. Qaladaǵy qańǵyrǵan qaiyrshynyń biri dep oilady. Bálkim, bizde oǵan kóńil bólmes edik. Qazir kimniń kimge jany ashysyn...
– Baýyrym, brat... toqtashy. Bir buiymtaiym bar edi.
– Iá...
– Brat, nár tatpaǵanyma eki kún boldy. Tiyn-tebeniń bolsa tastap ketshi.
Qolynda syrasy (ishtei ashy sýǵa aqsha tabylady dep oiladyq), bet-aýzy isip ketken, kiimi kir qojalaq adamdy kórgende, kirpidei jiyryla qalarymyz jasyryn emes qoi. Ol da sony sezgendei jasqanshaqtap tur.
– Az-muz tiyn-tebeniń bolsa... Dalada túnep júrgenime, mine, bir jeti boldy. Sońǵy kúnderi myna dúkenniń irgesin panalaýǵa májbúrmin. Jeldetkishten jyly jer urady. Barar jer, basar taý joq. Iship júrmin...
Dúkenge qarama qarsy úide tátem turatyn edi. Soǵan kelgem ǵoi. Esigin ashpai qoidy. Jaraidy, ony da túsinem. Bala-shaǵasy bar. Bárinen buryn meni qaiyrshy dep kemsitkeni aýyr tidi.
Baiqaimyz – sózi túzý. Soǵan qaraǵanda araqqa salynǵan adamǵa uqsamaidy. Áli jas. Biraq qara jumys qajytyp jibergen siiaqty.
– Meni bombj dep oilap qalma. Ondailardan aýlaq júremin. Sasyq isi bar... Qoqys qoparatyn jaǵdaiǵa jetkem joq. Iá, qaltamdaǵy sońǵy tiynǵa syra satyp aldym. Odan artyqqa jetpeidi. Ishkim kep ishkem joq. Araqqa salynǵan adam dep oilap qalma. Oi jep qoidy. Óz-ózimdi mújip, kemirip boldym.
Aty Serikbol eken. Taldyqorǵannan kelipti. «Qurylystyń has sheberimin»,– deidi. Ony da biraz áńgime qyldy.
– Gipsokarton, lipkas, kafel... bári de qolymnan keledi. Tek jumystan shyǵyp qalǵanym bolmasa. Qysqa qarai qurylys toqtap qalady ǵoi. Onyń ústine qysqartý júrdi. Men iligip kettim. Sodan jumys izdep sabylmaimyn ba... Basqa obektige barsam almaidy. Ol jaqta da ózim qusaqty jumys izdep júrgen qaraqurym halyq. Kúzetshilikti tóńirektep kórip edim, ol da múmkin bolmady. Sóitip jumystan shyqqan eki aidyń ishinde osyndai kepke tústim. Aýylda áielim, eki balam qaldy. Olar ash otyr demeimin. Tuńǵyshym keler jyly birinshi synypqa barady. Budan buryn tapqan tabysymdy solarǵa jiberip otyratynmyn. Otbasym «aýylǵa qait» deidi. Biraq, qaitqannan ne qaiyr. Ol jaqtaǵy jaǵdai belgili ǵoi. Kóktemge deiin shydai turý kerek. Shydaý kerek...
Meni bombj dep oilap qalma. Ondailardan aýlaq júremin. Sasyq isi bar... Qoqys qoparatyn jaǵdaiǵa jetkem joq. Iá, qaltamdaǵy sońǵy tiynǵa syra satyp aldym. Odan artyqqa jetpeidi. Ishkim kep ishkem joq. Araqqa salynǵan adam dep oilap qalma. Oi jep qoidy. Óz-ózimdi mújip, kemirip boldym.
Serikbol áli de biraz áńgimesin aitty. Joǵary bilimi bar eken. 2004 jyly Sport akademiiasyn bitirgen.
– Erkin kúresten sport sheberine kandidatpyn. Senbeseń, mine, qulaǵymdy qara. Osyndai kúige túskenime kúiinbeidi deisiń be? Oi jep júr sońǵy kúnderi. Jaramdy iship jazyp júrmin. Brat, nár tatpaǵanyma eki kún boldy. Tiyn-tebeniń bolsa tastap ketshi...
Oǵan túski asqa jeterlik aqsha ustattyq. Ony tamaqqa jumsady ma, álde araqqa ketirdi me, belgisiz.
P.S. Onyń aty – Serikbol Bazarhanov. Taldyqorǵannan kelipti. Aitýynsha, otbasy, bala-shaǵasy bar eken. Ol synyp ketýdiń az-aq aldynda tur. Qazaq balasy bulai qańǵyrmaýy kerek shyǵar. Onyń týǵan-týysqandary buǵan beijai qaramaidy degen úmittemiz.
Dýman BYQAI
