دٷكەنگە كٸرٸپ-شىعىپ جاتقان جۇرت وعان نازار دا اۋدارعان جوق. قالاداعى قاڭعىرعان قايىرشىنىڭ بٸرٸ دەپ ويلادى. بەلكٸم, بٸزدە وعان كٶڭٸل بٶلمەس ەدٸك. قازٸر كٸمنٸڭ كٸمگە جانى اشىسىن...
– باۋىرىم, برات... توقتاشى. بٸر بۇيىمتايىم بار ەدٸ.
– يە...
– برات, نەر تاتپاعانىما ەكٸ كٷن بولدى. تيىن-تەبەنٸڭ بولسا تاستاپ كەتشٸ.
قولىندا سىراسى (ٸشتەي اششى سۋعا اقشا تابىلادى دەپ ويلادىق), بەت-اۋزى ٸسٸپ كەتكەن, كيٸمٸ كٸر قوجالاق ادامدى كٶرگەندە, كٸرپٸدەي جيىرىلا قالارىمىز جاسىرىن ەمەس قوي. ول دا سونى سەزگەندەي جاسقانشاقتاپ تۇر.
– از-مۇز تيىن-تەبەنٸڭ بولسا... دالادا تٷنەپ جٷرگەنٸمە, مٸنە, بٸر جەتٸ بولدى. سوڭعى كٷندەرٸ مىنا دٷكەننٸڭ ٸرگەسٸن پانالاۋعا مەجبٷرمٸن. جەلدەتكٸشتەن جىلى جەر ۇرادى. بارار جەر, باسار تاۋ جوق. ٸشٸپ جٷرمٸن...
دٷكەنگە قاراما قارسى ٷيدە تەتەم تۇراتىن ەدٸ. سوعان كەلگەم عوي. ەسٸگٸن اشپاي قويدى. جارايدى, ونى دا تٷسٸنەم. بالا-شاعاسى بار. بەرٸنەن بۇرىن مەنٸ قايىرشى دەپ كەمسٸتكەنٸ اۋىر تيدٸ.
بايقايمىز – سٶزٸ تٷزۋ. سوعان قاراعاندا اراققا سالىنعان ادامعا ۇقسامايدى. ەلٸ جاس. بٸراق قارا جۇمىس قاجىتىپ جٸبەرگەن سيياقتى.
– مەنٸ بومبج دەپ ويلاپ قالما. وندايلاردان اۋلاق جٷرەمٸن. ساسىق يسٸ بار... قوقىس قوپاراتىن جاعدايعا جەتكەم جوق. يە, قالتامداعى سوڭعى تيىنعا سىرا ساتىپ الدىم. ودان ارتىققا جەتپەيدٸ. ٸشكٸم كەپ ٸشكەم جوق. اراققا سالىنعان ادام دەپ ويلاپ قالما. وي جەپ قويدى. ٶز-ٶزٸمدٸ مٷجٸپ, كەمٸرٸپ بولدىم.
اتى سەرٸكبول ەكەن. تالدىقورعاننان كەلٸپتٸ. «قۇرىلىستىڭ حاس شەبەرٸمٸن»,– دەيدٸ. ونى دا بٸراز ەڭگٸمە قىلدى.
– گيپسوكارتون, ليپكاس, كافەل... بەرٸ دە قولىمنان كەلەدٸ. تەك جۇمىستان شىعىپ قالعانىم بولماسا. قىسقا قاراي قۇرىلىس توقتاپ قالادى عوي. ونىڭ ٷستٸنە قىسقارتۋ جٷردٸ. مەن ٸلٸگٸپ كەتتٸم. سودان جۇمىس ٸزدەپ سابىلمايمىن با... باسقا وبەكتٸگە بارسام المايدى. ول جاقتا دا ٶزٸم قۇساقتى جۇمىس ٸزدەپ جٷرگەن قاراقۇرىم حالىق. كٷزەتشٸلٸكتٸ تٶڭٸرەكتەپ كٶرٸپ ەدٸم, ول دا مٷمكٸن بولمادى. سٶيتٸپ جۇمىستان شىققان ەكٸ ايدىڭ ٸشٸندە وسىنداي كەپكە تٷستٸم. اۋىلدا ەيەلٸم, ەكٸ بالام قالدى. ولار اش وتىر دەمەيمٸن. تۇڭعىشىم كەلەر جىلى بٸرٸنشٸ سىنىپقا بارادى. بۇدان بۇرىن تاپقان تابىسىمدى سولارعا جٸبەرٸپ وتىراتىنمىن. وتباسىم «اۋىلعا قايت» دەيدٸ. بٸراق, قايتقاننان نە قايىر. ول جاقتاعى جاعداي بەلگٸلٸ عوي. كٶكتەمگە دەيٸن شىداي تۇرۋ كەرەك. شىداۋ كەرەك...
مەنٸ بومبج دەپ ويلاپ قالما. وندايلاردان اۋلاق جٷرەمٸن. ساسىق يسٸ بار... قوقىس قوپاراتىن جاعدايعا جەتكەم جوق. يە, قالتامداعى سوڭعى تيىنعا سىرا ساتىپ الدىم. ودان ارتىققا جەتپەيدٸ. ٸشكٸم كەپ ٸشكەم جوق. اراققا سالىنعان ادام دەپ ويلاپ قالما. وي جەپ قويدى. ٶز-ٶزٸمدٸ مٷجٸپ, كەمٸرٸپ بولدىم.
سەرٸكبول ەلٸ دە بٸراز ەڭگٸمەسٸن ايتتى. جوعارى بٸلٸمٸ بار ەكەن. 2004 جىلى سپورت اكادەميياسىن بٸتٸرگەن.
– ەركٸن كٷرەستەن سپورت شەبەرٸنە كانديداتپىن. سەنبەسەڭ, مٸنە, قۇلاعىمدى قارا. وسىنداي كٷيگە تٷسكەنٸمە كٷيٸنبەيدٸ دەيسٸڭ بە? وي جەپ جٷر سوڭعى كٷندەرٸ. جارامدى ٸشٸپ جازىپ جٷرمٸن. برات, نەر تاتپاعانىما ەكٸ كٷن بولدى. تيىن-تەبەنٸڭ بولسا تاستاپ كەتشٸ...
وعان تٷسكٸ اسقا جەتەرلٸك اقشا ۇستاتتىق. ونى تاماققا جۇمسادى ما, ەلدە اراققا كەتٸردٸ مە, بەلگٸسٸز.
P.S. ونىڭ اتى – سەرٸكبول بازارحانوۆ. تالدىقورعاننان كەلٸپتٸ. ايتۋىنشا, وتباسى, بالا-شاعاسى بار ەكەن. ول سىنىپ كەتۋدٸڭ از-اق الدىندا تۇر. قازاق بالاسى بۇلاي قاڭعىرماۋى كەرەك شىعار. ونىڭ تۋعان-تۋىسقاندارى بۇعان بەيجاي قارامايدى دەگەن ٷمٸتتەمٸز.
دۋمان بىقاي
