Almaty qalasynyń ákimi Darhan Satybaldy Jetisý aýdanyndaǵy jumys saparyn jalǵastyrdy. Qala basshysy Qarasý ózeniniń jaǵalaýyn abattandyrý, mektep qurylysy jáne turǵyn úidi jańǵyrtý baǵdarlamasymen tanysty,- dep habarlaidy Dalanews.kz
Biyl aýdanda 26 shaqyrym jol ortasha jóndeýden ótedi, onyń 15 shaqyrymy Kemel shaǵynaýdanynda ornalasqan.
«Buryn da aitqanmyn – barlyq jol jóndeý jumystaryn jańa oqý jyly bastalǵanǵa deiin aiaqtaý qajet. Aýdan ákimi tikelei baqylaýǵa alýy kerek», – dedi Darhan Satybaldy.
Búginde Jetisý aýdanynda 21 memlekettik mektep jumys isteidi. Alaida halyq sanynyń ósýi men belsendi qurylysqa bailanysty 4 myńnan astam oqýshy orny jetispeidi. «Keleshek mektepteri» ulttyq jobasy aiasynda ákimdik jobalyq ofisiniń qoldaýymen Býrýndai kóshesinde 1 200 oryndyq jańa mekteptiń qurylysy bastaldy. Sol aýmaqta mektep salyp jatqan merdiger kompaniia 4 myń páterlik turǵyn úi keshenin de salyp jatyr, onyń 2,3 myńyn jumysshy jastar men halyqtyń áleýmettik osal toptaryn baspanamen qamtýǵa arnalǵan áleýmettik baǵdarlamalar aiasynda ákimdik satyp almaq. Osyny eskerip, qala basshysy bilim berý nysanynyń qurylysyn barynsha jedeldetýdi talap etti.
«Eger mektepti ýaqytynda tapsyrmasańyzdar – biz áleýmettik baǵdarlamalar úshin páter satyp almaimyz. Eshqandai sóz bolmaidy, tapsyrmasańyzdar – satyp almaimyz», – dedi Darhan Satybaldy.
Sondai-aq, qala ákimi Ainabulaq (Arbat) shaǵynaýdanyndaǵy jáne Maqataev kóshesindegi jaiaý júrginshi joldaryn abattandyrý jáne aǵymdaǵy jóndeý jumystarymen tanysty. Joba aiasynda kógaldandyrý, jaryqtandyrý, jaiaý júrginshi joldaryn tóseý jáne shaǵyn sáýlet nysandaryn ornatý qarastyrylǵan.
Issapar sońynda qala basshysy turǵyn úidi jańǵyrtý baǵdarlamasynyń júzege asyrylý barysymen tanysty. Krylov–Skriabin–Goncharov–Raiymbek dańǵyly kósheleri aralyǵyndaǵy aýmaqta 16 úi súrilip, turǵyndar kóshirilgen, 9 úi salynyp, taǵy 2 úidiń qurylysy júrip jatyr. Botkin–Qazakov–Goncharov–Skriabin–Raiymbek dańǵyly aýmaǵynda 6 úi súrilip, 3 úi salynǵan jáne tapsyrylǵan, 8 úidiń qurylysy júrip jatyr, olardyń qurylysy 2027 jylǵa deiin aiaqtalady dep josparlanǵan. Sonymen qatar, jańǵyrtý baǵdarlamasynan tys jeke investitsiialar aiasynda 10 eski úi men 11 jeke turǵyn úidi súrý josparlanǵan.
«100 myń sharshy metr úi salyndy, birde-bir mektep, birde-bir balabaqsha, birde-bir emhana joq. Munyń bárin durys esepteýlerińiz kerek. Arhitektorymyzǵa bárin qaita esepteýdi tapsyramyn», – dedi Darhan Satybaldy.
Ol renovatsiia baǵdarlamasyn júzege asyrý kezinde injenerlik jáne áleýmettik infraqurylymǵa túsetin júktemeni eskerý qajet ekenin naqtylady.
Budan bólek, Almaty ákimi aýdan turǵyndarymen kezdesip, olardyń ótinishterin tyńdady. Birqatar máselege ákim orynbasarlary men basqarma basshylary sol jerde túsinikteme berdi. Qalǵan suraqtar hattamaǵa engizilip, aldaǵy ýaqytta iske asyrý úshin baqylaýǵa alyndy.
