الماتى قالاسىنىڭ اكىمى دارحان ساتىبالدى جەتىسۋ اۋدانىنداعى جۇمىس ساپارىن جالعاستىردى. قالا باسشىسى قاراسۋ وزەنىنىڭ جاعالاۋىن اباتتاندىرۋ، مەكتەپ قۇرىلىسى جانە تۇرعىن ءۇيدى جاڭعىرتۋ باعدارلاماسىمەن تانىستى،- دەپ حابارلايدى Dalanews.kz

بيىل اۋداندا 26 شاقىرىم جول ورتاشا جوندەۋدەن وتەدى، ونىڭ 15 شاقىرىمى كەمەل شاعىناۋدانىندا ورنالاسقان.

«بۇرىن دا ايتقانمىن – بارلىق جول جوندەۋ جۇمىستارىن جاڭا وقۋ جىلى باستالعانعا دەيىن اياقتاۋ قاجەت. اۋدان اكىمى تىكەلەي باقىلاۋعا الۋى كەرەك»، – دەدى دارحان ساتىبالدى.

بۇگىندە جەتىسۋ اۋدانىندا 21 مەملەكەتتىك مەكتەپ جۇمىس ىستەيدى. الايدا حالىق سانىنىڭ ءوسۋى مەن بەلسەندى قۇرىلىسقا بايلانىستى 4 مىڭنان استام وقۋشى ورنى جەتىسپەيدى. «كەلەشەك مەكتەپتەرى» ۇلتتىق جوباسى اياسىندا اكىمدىك جوبالىق ءوفيسىنىڭ قولداۋىمەن بۋرۋنداي كوشەسىندە 1 200 ورىندىق جاڭا مەكتەپتىڭ قۇرىلىسى باستالدى. سول اۋماقتا مەكتەپ سالىپ جاتقان مەردىگەر كومپانيا 4 مىڭ پاتەرلىك تۇرعىن ءۇي كەشەنىن دە سالىپ جاتىر، ونىڭ 2،3 مىڭىن جۇمىسشى جاستار مەن حالىقتىڭ الەۋمەتتىك وسال توپتارىن باسپانامەن قامتۋعا ارنالعان الەۋمەتتىك باعدارلامالار اياسىندا اكىمدىك ساتىپ الماق. وسىنى ەسكەرىپ، قالا باسشىسى ءبىلىم بەرۋ نىسانىنىڭ قۇرىلىسىن بارىنشا جەدەلدەتۋدى تالاپ ەتتى.

«ەگەر مەكتەپتى ۋاقىتىندا تاپسىرماساڭىزدار – ءبىز الەۋمەتتىك باعدارلامالار ءۇشىن پاتەر ساتىپ المايمىز. ەشقانداي ءسوز بولمايدى، تاپسىرماساڭىزدار – ساتىپ المايمىز»، – دەدى دارحان ساتىبالدى.

سونداي-اق، قالا اكىمى اينابۇلاق (اربات) شاعىناۋدانىنداعى جانە ماقاتايەۆ كوشەسىندەگى جاياۋ جۇرگىنشى جولدارىن اباتتاندىرۋ جانە اعىمداعى جوندەۋ جۇمىستارىمەن تانىستى. جوبا اياسىندا كوگالداندىرۋ، جارىقتاندىرۋ، جاياۋ جۇرگىنشى جولدارىن توسەۋ جانە شاعىن ساۋلەت نىساندارىن ورناتۋ قاراستىرىلعان.

ءىسساپار سوڭىندا قالا باسشىسى تۇرعىن ءۇيدى جاڭعىرتۋ باعدارلاماسىنىڭ جۇزەگە اسىرىلۋ بارىسىمەن تانىستى. كرىلوۆ–سكريابين–گونچاروۆ–رايىمبەك داڭعىلى كوشەلەرى ارالىعىنداعى اۋماقتا 16 ءۇي ءسۇرىلىپ، تۇرعىندار كوشىرىلگەن، 9 ءۇي سالىنىپ، تاعى 2 ءۇيدىڭ قۇرىلىسى ءجۇرىپ جاتىر. بوتكين–قازاكوۆ–گونچاروۆ–سكريابين–رايىمبەك داڭعىلى اۋماعىندا 6 ءۇي ءسۇرىلىپ، 3 ءۇي سالىنعان جانە تاپسىرىلعان، 8 ءۇيدىڭ قۇرىلىسى ءجۇرىپ جاتىر، ولاردىڭ قۇرىلىسى 2027 جىلعا دەيىن اياقتالادى دەپ جوسپارلانعان. سونىمەن قاتار، جاڭعىرتۋ باعدارلاماسىنان تىس جەكە ينۆەستيسيالار اياسىندا 10 ەسكى ءۇي مەن 11 جەكە تۇرعىن ءۇيدى ءسۇرۋ جوسپارلانعان.

«100 مىڭ شارشى مەتر ءۇي سالىندى، بىردە-بىر مەكتەپ، بىردە-بىر بالاباقشا، بىردە-بىر ەمحانا جوق. مۇنىڭ ءبارىن دۇرىس ەسەپتەۋلەرىڭىز كەرەك. ارحيتەكتورىمىزعا ءبارىن قايتا ەسەپتەۋدى تاپسىرامىن»، – دەدى دارحان ساتىبالدى.

ول رەنوۆاسيا باعدارلاماسىن جۇزەگە اسىرۋ كەزىندە ينجەنەرلىك جانە الەۋمەتتىك ينفراقۇرىلىمعا تۇسەتىن جۇكتەمەنى ەسكەرۋ قاجەت ەكەنىن ناقتىلادى.

بۇدان بولەك، الماتى اكىمى اۋدان تۇرعىندارىمەن كەزدەسىپ، ولاردىڭ وتىنىشتەرىن تىڭدادى. ءبىرقاتار ماسەلەگە اكىم ورىنباسارلارى مەن باسقارما باسشىلارى سول جەردە تۇسىنىكتەمە بەردى. قالعان سۇراقتار حاتتاماعا ەنگىزىلىپ، الداعى ۋاقىتتا ىسكە اسىرۋ ءۇشىن باقىلاۋعا الىندى.