Kárim Másimovtiń burynǵy kúieýbalasy Azamat Kápenov ózine qatysty taraǵan aiyptaýlarǵa jaýap berip, Qazaqstannan aqsha jymqyryp, Qyrǵyzstanǵa jasyrynyp ketti degen pikirlerdiń shyndyqqa janaspaitynyn málimdedi, dep habarlaidy dalanews.kz.
Onyń aitýynsha, ata-anasyna tiesili "Evrotransgrýp" kompaniiasy Ortalyq Aziiadaǵy eń iri porttyń qurylysyn júrgizip jatyr. Joba Qastyq stantsiiasynda ornalasqan, jalpy aýmaǵy – 51 gektar. Kápenov jer telimderi jeke tulǵalardan «Krysha» gazeti arqyly satyp alynǵanyn aitty.
«Jobanyń barlyǵy nesie qarajatyna júzege asyryldy. Aldymen “Sberbank”, keiin “Bereke Bank” qarjylandyrdy. Qurylys 2022 jyldyń maýsymynda bastaldy. Sol kezde Nachebov jazasyn ótep jatqan edi», – dedi ol.
Kápenovtiń sózinshe, port qurylysynyń alǵashqy kezeńi 2023 jyldyń aqpanynda aiaqtalǵan. Onyń málimdeýinshe, joba qazirdiń ózinde tabys ákelip otyr.
«Port ai saiyn shamamen 1 million dollar kóleminde paida túsire bastady», – dedi ol.
Sondai-aq Azamat Kápenov aldaǵy ýaqytta ózine qatysty týǵan máselelerdiń mán-jaiyn egjei-tegjeili túsindiretinin aitty. Onyń sózinshe, ol Qarjylyq monitoring agenttiginiń áreketteri, sondai-aq qazirgi iesi katarlyq bank bolyp sanalatyn Bereke Bank-tiń jumysy týraly málimdeme jasamaq.
«Reiderlik týraly, reiderlik áreketter jónindegi aryzdar týraly da aityp beremin», – dedi Kápenov.
Eske salaiyq, buǵan deiin izdeý jariialanǵan Azamat Kápenov Birikken Arab Ámirlikterinde jasyrynyp júrýi múmkin ekeni aityldy. Bul týraly aqparat «Vyhod k moriý» telegram arnasynda paida bolǵan edi.
Telegramdaǵy málimet boiynsha, bul týraly aqparat reseilik «Magistral» júiesinde paida bolǵan. «Magistral» - el ishinde qoǵamdyq kólik jolaýshylarynyń qozǵalysyn jáne olardyń Resei Federatsiiasynyń Memlekettik shekarasynan ótýin tirkep otyratyn júie. «Vyhod k moriý» Kápenov Máskeýden Dýbaiǵa 2023 jyldyń 22 shildesinde ushyp ketip, qaitadan oralmaǵanyn jazady.
