Májilis depýtaty Aidos Sarym Qazaqstanda jariialanǵan ákimshilik amnistiiaǵa qatysty depýtattyq saýal joldap, birqatar mańyzdy máselelerdi kóterdi, dep habarlaidy Dalanews.kz.
Onyń aitýynsha, bul bastama – el tarihyndaǵy alǵashqy ákimshilik amnistiia jáne ol Memleket basshysynyń jańa Halyq Konstitýtsiiasyn qabyldaýymen bailanysty jariialanyp otyr.
Depýtat jaqynda Almatydaǵy Ál-Farabi dańǵylynda bolǵan qaiǵyly jol apatyn mysalǵa keltirip, quqyqtyq jaýapkershilik máselesine nazar aýdardy. Ol atalǵan apat saldarynan úsh adam qaza taýyp, birneshe otbasynyń taǵdyryna aýyr soqqy bolǵanyn eske saldy.
"Balalar ata-anasyz qaldy, al ata-analar óz perzentterinen aiyryldy. Mundai tragediialar qoǵamda úrei men alańdaýshylyq týdyrady, zańǵa degen senimdi álsiretedi", - dedi Aidos Sarym.
Sondai-aq ol mas kúiinde kólik júrgizip, adam ólimine ákelgen jol-kólik oqiǵalary úshin jaýapkershilikti qaita qaraý qajettigin atap ótti. Depýtat ýákiletti organdarǵa halyqaralyq tájiribeni negizge ala otyryp, jazany qatańdatý boiynsha usynystar engizýdi usyndy.
Sonymen qatar Sarym ákimshilik amnistiia bastamasynyń qoǵam tarapynan jalpy oń qabyldanǵanyn jetkizdi. Onyń pikirinshe, bul qadam áleýmettik turǵydan osal toptarǵa jeńildik berip, "Ádiletti Qazaqstan" qurý jolyndaǵy mańyzdy sheshimderdiń biri bolýy múmkin.
Alaida depýtat amnistiia aiasynda júrgizýshi kýáliginen aiyrylǵan azamattarǵa quqyqtaryn qaitarý usynysyna úzildi-kesildi qarsy ekenin málimdedi.
"Biz buǵan barýǵa moraldyq turǵyda quqyly emespiz. Júrgizýshi kýáliginen aiyrylǵandardyń basym bóligi – zańdy júieli túrde buzǵan, mas kúiinde kólik tizgindegen, jol qozǵalysy erejelerin elemegen adamdar", – dedi ol.
Onyń aitýynsha, mundai azamattarǵa qaitadan kólik basqarý quqyǵyn berý qoǵam qaýipsizdigine tikelei qater tóndiredi.
"Bul – jai ǵana quqyq buzýshylar emes, bul – áleýetti qaýip kózi. Olarǵa qaita múmkindik berý arqyly erteń jańa qaiǵyly oqiǵalarǵa jol ashamyz", – dedi depýtat.
Aidos Sarym amnistiia – memleket pen qoǵamnyń gýmanizm aktisi ekenin, alaida bul qaǵida adam ómirine qaýip tóndiretin áreketterge qatysty qoldanylmaýy tiis ekenin atap ótti.
Sondai-aq ol zań qabyldaý kezinde basty ólshem azamattardyń qaýipsizdigi bolýy keregin aitty. Depýtattyń sózinshe, eger qabyldanatyn sheshimder halyqtyń ómirin qaýipsiz etpese, onda mundai bastamalardan bas tartý qajet.
Ol kópshilik sailaýshylar da osy ustanymdy qoldaitynyna senim bildirdi.
