Astanaǵa kireberiste iri shirkeý salý bastamasy máslihat depýtaty Baýyrjan Smailovtyń synyna ushyrady, dep habarlaidy Dala News.
Astana qalalyq máslihatynyń otyrysynda elordaǵa kireberis aýmaqta Ortalyq Aziiadaǵy eń iri shirkeý salý jospary talqylanyp, depýtat Baýyrjan Smailov bul bastamaǵa ashyq qarsylyq bildirdi.
Depýtattyń aitýynsha, qalada túrli konfessiialarǵa arnalǵan ǵibadat oryndary jetkilikti, al elorda qaqpasyna aýqymdy shirkeý salý qoǵam úshin maqtanatyn joba emes.
«Ortalyq Aziiadaǵy eń úlken shirkeý salynbaq deidi. Oǵan qarjyny kim bólip jatyr? Ondai nysan bizge shynymen qajet pe? Biz bul máseleni jan-jaqty taldadyq pa? Qalada shirkeýler bar, úlkeni de, kishisi de jetkilikti. Al elordanyń kireberisine osyndai nysan salý maqtanatyn jaǵdai emes», – dedi Baýyrjan Smailov máslihat otyrysynda.
Bul synǵa jaýap bergen Nura aýdanynyń ákimi Rishat Turdybekov jobanyń burynnan bekitilgenin alǵa tartty. Onyń aitýynsha, shirkeý qurylysy memlekettik biýdjet esebinen salynbaidy.
«Bul nysan bas josparǵa sáikes qarastyrylǵan. Meshit bolsyn, shirkeý bolsyn biýdjetten qarjy bólinbeidi. Qurylys qaiyrymdylyq qarajat esebinen júrgiziledi. Atalǵan jospar 2018–2019 jyldary bekitilgen», – dedi aýdan ákimi.
Sonymen qatar, Rishat Turdybekov bul másele boiynsha keiinirek qosymsha aqparat beriletinin málimdedi.
Aita keteiik, elorda aýmaǵyndaǵy iri qurylys jobalary qoǵamda jii pikirtalas týdyryp keledi. Bul joly da qala kelbeti men qoǵamdyq suranys arasyndaǵy tepe-teńdik máselesi kún tártibine shyqty.
