Maqtaaral aýdanynda asfalt-beton zaýyty, polietilen ónimderiniń jáne meditsinalyq maqta ónimderiniń óndirisi, sondai-aq temirdi qaita óńdeý óndirisi iske aspaqshy. Oblys boiynsha maqta shikizatynyń 70 paiyzdan astamy Maqtaaral jáne Jetisai aýdandaryna tiesili bolǵanymen, óńirde shikizatty ári qarai daiyn ónimge ainaldyratyn kásiporyndar joqtyń qasy. Bul rette Maqtaaraldyń indýstrialdy aimaǵynda toqyma klasterine, sondai-aq maqtadan daiyn ónim jasaityn basqa da jobalarǵa kóńil bólinetin bolady.
Oblys ákimi orynbasarynyń sońǵy tanysqan nysany – «Qazaq maqta sharýashylyǵy» ǵylymi zertteý institýty. Maqta sharýashylyǵyndaǵy ǵylymi-zertteýlerdi damytý arqyly otandyq básekege qabiletti maqtanyń jańa sorttaryn shyǵarý, maqta óndirýdiń tiimdiligin, innovatsiialyq tehnologiialardy óndiriske endirýmen Qazaq maqta sharýashylyǵy ǵylymi-zertteý institýtynyń ǵalymdary ainalysyp, birqatar jetistikterge jetti. Maqtanyń 12 orta talshyqty, syrtqy ortanyń qolaisyz faktorlaryna tózimdi, ónimdiligi basqalardan 5-6 ts/ga joǵary sorttary shyǵaryldy. Olardyń 7-eýi (PA-3044, Maqtaaral-4005, PA-3031, Bereke-07, Maqtaaral-4007, Maqtaaral-4011, Myrzashól-80) aýdandastyryldy.
«Biz maqtadan bólek, baqsha daqyldaryn zertteýdi de qolǵa aldyq. Qazirgi tańda eksportqa tózimdi, básekege jaramdy myqty sorttardy jasap shyǵardyq. Maqtaaraldyq ǵalymdar jasaǵan «Myrzashól», «Jien», «Valet» atty sorttardy Jetisai, Shardara, Otyrar siiaqty baqsha daqyldaryn óndiretin birneshe aýdandardyń sharýalary paidalanýda. Búgingi tańda Túrkistan oblysy boiynsha óndiriletin 1 million 300 myń tonnadan astam baqsha ónimderiniń basym bóligi, onyń ishinde eksportqa shyǵyp jatqan baqsha ónimderiniń barlyǵy derlik biz jasap shyǵarǵan sorttar ekenin aita ketý kerek» - dedi institýt direktory I.Úmbetaev.
Aita keteiik, oblys ákiminiń orynbasary E.Tasjúrekov institýt ǵalymdarynyń jumystaryna dán riza bolyp, Maqtaaral aýdanynda jasalyp jatqan indýstriialandyrý jumystaryna oń baǵa berdi.
