تۇركىستان وبلىسى اكىمىنىڭ ورىنباسارى ەربول تاسجۇرەكوۆ پەن وبلىستىق كاسىپكەرلىك، يندۋستريالدى-يننوۆاسيالىق دامۋ باسقارماسىنىڭ باسشىسى عانيبەت اۋباكىروۆ ماقتاارال اۋدانىنا جۇمىس ساپارىمەن كەلدى. اۋدان اكىمى باقىت اسانوۆ جەرگىلىكتى جەردەگى يندۋستريالاندىرۋ جۇمىستارىنىڭ جاي-كۇيىجانە اۋىل شارۋاشىلىعىنىڭ دامۋ بارىسىمەن تانىستىردى.

ە.تاسجۇرەكوۆ ماقتاارال اۋدانىنىڭ يندۋستريالدى ايماعىنا بارىپ، ماقتا تەرۋ ماۋسىمىنا وراي قىزۋ جۇمىس جاساپ جاتقان «بەرەكە-مما» ماقتا تازارتۋ زاۋىتىنىڭ جۇمىسىمەن تانىستى. اعىمداعى جىلى ماقتاارال اۋدانىنىڭ يندۋستريالدى ايماعىندا 1 جوبا، كەلەسى جىلى 2 جوبا، ارعى جىلى تاعى 1 جوبا ىسكە اسىرىلىپ، 200-دەن استام ادام تۇراقتى جۇمىس ورنىمەن قامتىلاتىن بولادى.

ماقتاارال اۋدانىندا اسفالت-بەتون زاۋىتى، پوليەتيلەن ونىمدەرىنىڭ جانە مەديسينالىق ماقتا ونىمدەرىنىڭ ءوندىرىسى، سونداي-اق تەمىردى قايتا وڭدەۋ ءوندىرىسى ىسكە اسپاقشى. وبلىس بويىنشا ماقتا شيكىزاتىنىڭ 70 پايىزدان استامى ماقتاارال جانە جەتىساي اۋداندارىنا تيەسىلى بولعانىمەن، وڭىردە شيكىزاتتى ءارى قاراي دايىن ونىمگە اينالدىراتىن كاسىپورىندار جوقتىڭ قاسى. بۇل رەتتە ماقتاارالدىڭ يندۋستريالدى ايماعىندا توقىما كلاستەرىنە، سونداي-اق ماقتادان دايىن ءونىم جاسايتىن باسقا دا جوبالارعا كوڭىل بولىنەتىن بولادى.

وبلىس اكىمى ورىنباسارىنىڭ سوڭعى تانىسقان نىسانى – «قازاق ماقتا شارۋاشىلىعى» عىلىمي زەرتتەۋ ينستيتۋتى. ماقتا شارۋاشىلىعىنداعى عىلىمي-زەرتتەۋلەردى دامىتۋ ارقىلى وتاندىق باسەكەگە قابىلەتتى ماقتانىڭ جاڭا سورتتارىن شىعارۋ، ماقتا ءوندىرۋدىڭ تيىمدىلىگىن، يننوۆاسيالىق تەحنولوگيالاردى وندىرىسكە ەندىرۋمەن قازاق ماقتا شارۋاشىلىعى عىلىمي-زەرتتەۋ ينستيتۋتىنىڭ عالىمدارى اينالىسىپ، ءبىرقاتار جەتىستىكتەرگە جەتتى. ماقتانىڭ 12 ورتا تالشىقتى، سىرتقى ورتانىڭ قولايسىز فاكتورلارىنا ءتوزىمدى، ونىمدىلىگى باسقالاردان 5-6 س/گا جوعارى سورتتارى شىعارىلدى. ولاردىڭ 7-ەۋى (پا-3044، ماقتاارال-4005، پا-3031، بەرەكە-07، ماقتاارال-4007، ماقتاارال-4011، ءمىرزاشول-80) اۋدانداستىرىلدى.

«ءبىز ماقتادان بولەك، باقشا داقىلدارىن زەرتتەۋدى دە قولعا الدىق. قازىرگى تاڭدا ەكسپورتقا ءتوزىمدى، باسەكەگە جارامدى مىقتى سورتتاردى جاساپ شىعاردىق. ماقتاارالدىق عالىمدار جاساعان «ءمىرزاشول»، «جيەن»، «ۆالەت» اتتى سورتتاردى جەتىساي، شاردارا، وتىرار سياقتى باقشا داقىلدارىن وندىرەتىن بىرنەشە اۋدانداردىڭ شارۋالارى پايدالانۋدا. بۇگىنگى تاڭدا تۇركىستان وبلىسى بويىنشا وندىرىلەتىن 1 ميلليون 300 مىڭ توننادان استام باقشا ونىمدەرىنىڭ باسىم بولىگى، ونىڭ ىشىندە ەكسپورتقا شىعىپ جاتقان باقشا ونىمدەرىنىڭ بارلىعى دەرلىك ءبىز جاساپ شىعارعان سورتتار ەكەنىن ايتا كەتۋ كەرەك» - دەدى ينستيتۋت ديرەكتورى ي.ۇمبەتايەۆ.

ايتا كەتەيىك، وبلىس اكىمىنىڭ ورىنباسارى ە.تاسجۇرەكوۆ ينستيتۋت عالىمدارىنىڭ جۇمىستارىنا ءدان ريزا بولىپ، ماقتاارال اۋدانىندا جاسالىپ جاتقان يندۋستريالاندىرۋ جۇمىستارىنا وڭ باعا بەردى.