Bul týraly Ortalyq komýnıkasıalar qyzmetiniń alańynda oblystyń áleýmettik-ekonomıkalyq damýy týraly esep berý barysynda Túrkistan oblysynyń ákimi Darhan Satybaldy málim etti, – dep habarlaıdy Dalanews.kz Túrkistan oblysy ákiminiń baspasóz qyzmetine silteme jasap.

–  Túrkistan oblysy respýblıkada maqta ósiretin jalǵyz aımaq. Bıyl 106 myń gektarǵa maqta egildi. Degenmen, dástúrli ádisti qoldanǵandyqtan onyń ónimdiligi de tómen bolyp otyr. Endi zamanaýı sýdy únemdeý tehnologıalaryn qoldana otyryp, maqtanyń elıtalyq sorttaryn ósirýdi jáne shıkizatty tereń óńdeýdi qamtıtyn maqta-toqyma klasterin qurý qolǵa alyndy.

Iaǵnı, maqta ósirýden bastap jip, mata jáne kıim sıaqty daıyn toqyma ónimderin óndirýge deıin qamtylady. Túrkistan qalasynda maqtany tereń óńdeıtin iri zaýyttyń qurylysy bastaldy. Joba quny – 147 mlrd. teńge. Zaýytta 4 000-nan astam jumys orny ashylady, – dedi Darhan Satybaldy.

Jalpy óńirde maqta klasterinde 9 jobany iske asyrý josparlanyp otyr. Tolyq iske qosylǵanda 40 myńnan astam jumys orny qurylyp, 50 myń tonnaǵa jýyq daıyn ónim óndiriledi. Búdjetke mıllıardtaǵan salyq túsedi. Maqta ónimdiligi 3 esege deıin artyp, ónimdilik kórsetkishi gektaryna 70 sentnerge jetedi dep mejelenip otyr. Aımaqta maqta egýde sý únemdeý tehnologıalary qoldanylýda.

Maqtaly aımaqtarda egistikti ártaraptandyrý baǵytynda da jumys bastalǵan. Aımaqta júgerini tereń óńdeıtin «Krahmal-sirne» zaýyty salynýda. Joba quny – 36 mlrd.teńge.  Joba tolyq iske qosylǵanda jylyna 150 myń tonna júgerini tereń óńdeýge múmkindik beredi. 550 jańa jumys orny ashylyp, júgeriden 26 túrli ónim shyǵarylady dep kútilip otyr.