Ánshi ári prodiýser Qydyráli Bolmanov kezinde ózi óner kórsetken "ABK" tobynyń alǵashqy kontsertin uiymdastyrý barysynda Zamanbek Nurqadilov pen Maqpal Júnisovanyń qandai kómegi tigenin esine aldy, dep habarlaidy Dalanews.kz.
"Maqpal hanymdy alǵash ret halyqaralyq “Aziia daýysy” konkýrsynda kórdim. Tanysa kele, ózine ǵana tán, ashyq-jarqyn kóńilińdi kóteretin ǵajap kúlkisi baryn baiqadym. Al ánshi retinde – óz aldyna bir mektep! Adamgershiligi de sondai biik", – dep jazdy ol.
Qydyráli Bolmanovtyń aitýynsha, "ABK" tobynyń alǵashqy kontsertin uiymdastyrý kezinde kontsert ótkizýge zal tabý qiyndyq týdyrǵan. Dál osy sátte jolyqqan Maqpal Júnisova oǵan ákimniń qabyldaýyna kirýge kómektesken.
"Ol kezde Zamanbek aǵamyz (jany jánnatta bolsyn!) Almaty qalasynyń ákimi edi. Demeýshi kerek kezeń. Mán-jaidy aityp, Zamanbek aǵaǵa kirýge kómektesýin ótindim.
10 minýt shamasynda Maqpal hanym telefon shalyp: "Búgin, 16:20-da bar. Qabyldaityn boldy" dedi.
Alǵysymdy jaýdyryp jatyrmyn. Qýanyshymda shek joq! Belgilengen ýaqytta ákimniń kabinetine kirsem, ol telefonmen sóilesip otyr eken. "Qabyldaimyn, mine ózi de keldi" dep jymiyp, birden qoldaý kórsetetinin aitty. Osylaisha, kontsert ótti, zal lyq toldy", – dep eske aldy Bolmanov.
Ánshi sondai-aq Maqpal Júnisovanyń janashyrlyǵyn erekshe atap ótti.
"Meni ákimge kirgizip qana qoimai, keiin de habarlasyp: "Keldi me? Qabyldadyń ba?" – dep qaita suraǵan eken. Osy aq kóńilin eshqashan umytpaimyn", – deidi ol.
