Poeziia báigesi Taldyqorǵan qalasyndaǵy Lomonosov atyndaǵy mektepte uiymdastyrylǵan Muqaǵali oqýlaryna Almaty oblysy bilim basqarmasy tárbie jumysy jáne qosymsha bilim berý bólimi, «Jetisý daryny» oblystyq daryndy balar men talantty jastardy anyqtaý jáne qoldaý oqý-ádistemelik ortalyǵy muryndyq boldy.
Muqaǵali Maqataevtyń 91 jyldyǵynyń aiasynda jalaýy jelbiregen ádebi dodaǵa oblystyń ár aimaǵynan 63 oqýshy qatysyp, jyrqumar daryndylar úsh atalym boiynsha baq synady.
Qatysýshylar «Aityp ótken aqynda arman bar ma?» atty baǵytta Muqǵali Maqataevtyń óleńderin jatqa oqysa, «Jyr estafetasy» atalymynda «Aqqýlar uiyqtaǵanda», «Altai-Atyraý», «Raiymbek-Raiymbek» poemalaryn jatqa aitty. Al «Kókiregimde jyr sáýlesi mazdaidy...» baǵytynda oqýshy óz shyǵarmashylyǵynan 3-5 shýmaqtan turatyn óleńin qazylar alqasynyń tańdaýy boiynsha oqydy.
Qazylar alqasy qatysýshylardyń tiliniń tazalyǵy, sahna mádenieti, múdirmei jatqa aitýyna, kórkem oqýyna asa mán berdi. Jarys barysynda ár oqýshynyń óner kórsetýinen keiin ádil qazylar upailardy kórsetip otyrdy. Baǵalaýdaǵy shekti ball-10 upai boldy.
– Jyldaǵy dástúr boiynsha Muqaǵali oqýlary ótti. Ár baǵytqa 1 oqýshy, aýdan-qala boiynsha barlyǵy 3 úmitker usynylady. Búgin muzbalaq aqynnyń shyǵarmalaryna sýsyndap ósken jastar poeziia báigesinde baq synady. Ózderińiz bilesizder, pandemiia kezinde barlyq jarystar onlain formatta uiymdastyrylǵan edi. Araǵa eki jyl salyp úlken baiqaýda bas qostyq. Osy ýaqyt aralyǵynda ustazdar men saiysqa qatysýshylardyń daiyndyqta birshama aqsaǵanyn baiqadyq. Aldaǵy ýaqytta bul kemshilikterdi túzetemiz, – dedi Almaty oblysy bilim basqarmasynyń bas mamany, qazylar alqasynyń múshesi Rýslan Arslanov.
5 saǵatqa sozylǵan baiqaýda kil myqtynyń ishinen, shyn júirik sýyrylyp shyqty. Ár bir oqýshy qarym-qabileti men daiyndyq deńgeiine qarai júldeli oryndardan kórindi.
Saiys qorytyndysy boiynsha, «Aityp ótken aqynda arman bar ma?» atalymyndy Uiǵyr aýdanynan kelgen Móldir Ermuqanova, «Jyr estafetasy» baǵytynda Talǵar aýdanynyń namysyn qorǵaǵan Madiiar Erqanat, «Kókiregimde jyr sáýlesi mazdaidy...» kezeńinde Eńbekshiqazaq aýdanynyń oqýshysy Erbol Medetbekuly júldeli 1 oryndy qanjyǵalaryna bailady.
Jarysta qatarynan oq boiy oza shaýyp, respýblikaǵa joldama alǵandardyń qýanyshynda shek joq. Solardyń biri-Madiiar Erqanat.
«Men «Jyr estafetasyna» qatystym. Jarysqa daiyndyq barysy qyzý ótti. Oblystyq Muqaǵali oqýlary bolǵandyqtan básekede myqty bolary anyq. Degenmen, ózimniń daiyndyǵyma sendim. Alǵashqy ainalymnan júldeger atanatynymdy sezdim» deidi Muqaǵali Maqataev oqýlarynyń 1 oryn iegeri.
Ár baǵyttaǵy júldegerler sanyna keler bolsaq, 2 oryn-ekeý, 3 oryn-úsheý boldy. Osylaisha, poeziiany janyna serik etkender laiyqty tuǵyrynan tabyldy.
