پوەزيا بايگەسى تالدىقورعان قالاسىنداعى لومونوسوۆ اتىنداعى مەكتەپتە ۇيىمداستىرىلعان مۇقاعالي وقۋلارىنا الماتى وبلىسى ءبىلىم باسقارماسى تاربيە جۇمىسى جانە قوسىمشا ءبىلىم بەرۋ ءبولىمى، «جەتىسۋ دارىنى» وبلىستىق دارىندى بالار مەن تالانتتى جاستاردى انىقتاۋ جانە قولداۋ وقۋ-ادىستەمەلىك ورتالىعى مۇرىندىق بولدى.
مۇقاعالي ماقاتايەۆتىڭ 91 جىلدىعىنىڭ اياسىندا جالاۋى جەلبىرەگەن ادەبي دوداعا وبلىستىڭ ءار ايماعىنان 63 وقۋشى قاتىسىپ، جىرقۇمار دارىندىلار ءۇش اتالىم بويىنشا ب ا ق سىنادى.
قاتىسۋشىلار «ايتىپ وتكەن اقىندا ارمان بار ما؟» اتتى باعىتتا مۇقعالي ماقاتايەۆتىڭ ولەڭدەرىن جاتقا وقىسا، «جىر ەستافەتاسى» اتالىمىندا «اققۋلار ۇيىقتاعاندا»، «التاي-اتىراۋ»، «رايىمبەك-رايىمبەك» پوەمالارىن جاتقا ايتتى. ال «كوكىرەگىمدە جىر ساۋلەسى مازدايدى...» باعىتىندا وقۋشى ءوز شىعارماشىلىعىنان 3-5 شۋماقتان تۇراتىن ولەڭىن قازىلار القاسىنىڭ تاڭداۋى بويىنشا وقىدى.
قازىلار القاسى قاتىسۋشىلاردىڭ ءتىلىنىڭ تازالىعى، ساحنا مادەنيەتى، مۇدىرمەي جاتقا ايتۋىنا، كوركەم وقۋىنا اسا ءمان بەردى. جارىس بارىسىندا ءار وقۋشىنىڭ ونەر كورسەتۋىنەن كەيىن ءادىل قازىلار ۇپايلاردى كورسەتىپ وتىردى. باعالاۋداعى شەكتى بالل-10 ۇپاي بولدى.
– جىلداعى ءداستۇر بويىنشا مۇقاعالي وقۋلارى ءوتتى. ءار باعىتقا 1 وقۋشى، اۋدان-قالا بويىنشا بارلىعى 3 ۇمىتكەر ۇسىنىلادى. بۇگىن مۇزبالاق اقىننىڭ شىعارمالارىنا سۋسىنداپ وسكەن جاستار پوەزيا بايگەسىندە ب ا ق سىنادى. وزدەرىڭىز بىلەسىزدەر، پاندەميا كەزىندە بارلىق جارىستار ونلاين فورماتتا ۇيىمداستىرىلعان ەدى. اراعا ەكى جىل سالىپ ۇلكەن بايقاۋدا باس قوستىق. وسى ۋاقىت ارالىعىندا ۇستازدار مەن سايىسقا قاتىسۋشىلاردىڭ دايىندىقتا ءبىرشاما اقساعانىن بايقادىق. الداعى ۋاقىتتا بۇل كەمشىلىكتەردى تۇزەتەمىز، – دەدى الماتى وبلىسى ءبىلىم باسقارماسىنىڭ باس مامانى، قازىلار القاسىنىڭ مۇشەسى رۋسلان ارسلانوۆ.
5 ساعاتقا سوزىلعان بايقاۋدا كىل مىقتىنىڭ ىشىنەن، شىن جۇيرىك سۋىرىلىپ شىقتى. ءار ءبىر وقۋشى قارىم-قابىلەتى مەن دايىندىق دەڭگەيىنە قاراي جۇلدەلى ورىنداردان كورىندى.
سايىس قورىتىندىسى بويىنشا، «ايتىپ وتكەن اقىندا ارمان بار ما؟» اتالىمىندى ۇيعىر اۋدانىنان كەلگەن ءمولدىر ەرمۇقانوۆا، «جىر ەستافەتاسى» باعىتىندا تالعار اۋدانىنىڭ نامىسىن قورعاعان ماديار ەرقانات، «كوكىرەگىمدە جىر ساۋلەسى مازدايدى...» كەزەڭىندە ەڭبەكشىقازاق اۋدانىنىڭ وقۋشىسى ەربول مەدەتبەك ۇلى جۇلدەلى 1 ورىندى قانجىعالارىنا بايلادى.
جارىستا قاتارىنان وق بويى وزا شاۋىپ، رەسپۋبليكاعا جولداما العانداردىڭ قۋانىشىندا شەك جوق. سولاردىڭ ءبىرى-ماديار ەرقانات.
«مەن «جىر ەستافەتاسىنا» قاتىستىم. جارىسقا دايىندىق بارىسى قىزۋ ءوتتى. وبلىستىق مۇقاعالي وقۋلارى بولعاندىقتان باسەكەدە مىقتى بولارى انىق. دەگەنمەن، ءوزىمنىڭ دايىندىعىما سەندىم. العاشقى اينالىمنان جۇلدەگەر اتاناتىنىمدى سەزدىم» دەيدى مۇقاعالي ماقاتايەۆ وقۋلارىنىڭ 1 ورىن يەگەرى.
ءار باعىتتاعى جۇلدەگەرلەر سانىنا كەلەر بولساق، 2 ورىن-ەكەۋ، 3 ورىن-ۇشەۋ بولدى. وسىلايشا، پوەزيانى جانىنا سەرىك ەتكەندەر لايىقتى تۇعىرىنان تابىلدى.
