Májilis depýtaty Ashat Aimaǵambetov Qazaqstandaǵy biýdjet tapshylyǵynyń negizgi sebepteri men kemshilikterin atady, dep habarlaidy Dalanews.kz.
Onyń sózinshe, biýdjet qarajatyn jumsaýda Úkimet pen Qarjy ministrligine berilgen keń quzyretterdiń esebi tómen, naqty erejeler men talaptar tolyq anyqtalmaǵan. Al bul óz kezeginde qarjynyń tiimsiz ári josparsyz jumsalýyna itermeleýde.
Aimaǵambetovtyń pikirinshe, qazir Úkimet Parlamenttiń kelisiminsiz biýdjetti jylyna 8–10 ret ózgerte alady.
“Nátijesinde bastapqyda bekitilgen biýdjet pen onyń maqsattary túbegeili ózgeristerge ushyraidy, al mańyzdy máseleler kóp jaǵdaida kabinet ishinde ǵana sheshiledi. Mundai jaǵdai biýdjettiń tiimdiligine jáne eldiń qarjylyq turaqtylyǵyna keri áserin tigizýde”, - dedi ol.
Depýtat ministrlikterdiń biýdjet baǵdarlamalary aiasynda qarajatty óz betinshe qaita bólý múmkindigine de toqtaldy.
“Bul úderisti retteitin naqty erejeler men reglamentter joq. Jańa Biýdjet kodeksi jobasynda baǵdarlamalardy irilendirý jáne ministrlikterge odan da úlken derbestik berý kózdelýde. Alaida esep pen naqty mindettersiz, bilikti mamandarsyz jáne memlekettik josparlaýdyń tiimdi júiesinsiz mundai derbestik qaýipti bolýy múmkin. Ishki oryndaý jáne baqylaý mehanizmderin ózgertpei, syrtqy bloktyq qurylymdy engizý máseleni sheshpeidi, kerisinshe, ony ýshyqtyrýy yqtimal. Eger bul úrdis jalǵasa berse, bolashaqta Parlamentte árbir ministrlikke jalpy soma ǵana bekitilip, al ministrlikter ishki qarajatty óz qalaýy boiynsha bóle beretin jaǵdaiǵa jetýimiz múmkin. Bul biýdjetti bekitýdiń mánin joǵaltýǵa ákeledi”, - dep atap ótti ol.
Aimaǵambetovtyń aitýynsha, Ulttyq qordan bólinetin transfertterge qatysty naqty talaptardyń bolmaýy da kúrdeli máselege ainaldy.
“Ulttyq qordan kepildendirilgen transfertter úkimetti shekteitindei kóringenimen, is júzinde úkimet sol transferttiń talabyndaǵy álsizdikterdi paidalanyp, túrli qarjylyq qajettilikter úshin qarajatty ońai tarta alady. Bolashaq urpaqtyń murasy retinde saqtalýǵa tiis Ulttyq qor biýdjet tapshylyǵyn jabý men tiimsizdik máselelerin sheshýdiń basty kózine ainalyp otyr”, - dedi ol.
Ashat Aimaǵambetovtyń pikirinshe, blok-biýdjet júiesiniń engizilýi ministrlikterge qarajatty bólýge erkindik bergenimen, eseptilikten bosatpaý qajettigin eskertedi.
“Barlyq qurylymǵa tiimdilik kórsetkishteri naqty, túsinikti jáne ashyq bolýy kerek. Ministrlikterdiń derbestigi mindetti túrde Parlament pen qoǵam aldynda esep berýmen qamtamasyz etilýi tiis,” – deidi ol.
Depýtattyń pikirinshe, jańa Biýdjet kodeksi jobasy biýdjet júiesiniń túitkildi máselelerin sheshe almai otyr.
“Ókinishke qarai, jańa Biýdjet kodeksi jobasynda burynǵy kemshilikter saqtalyp, biýdjet júiesiniń júieli máseleleri sheshilmegen. Qazirgi ýaqytta osy jáne basqa da baǵyttar boiynsha usynylǵan túzetýler qyzý talqylanýda. Alaida úkimettiń qorytyndylarynda kóptegen oryndy normalar qoldaý tappai otyr”, - dep sózin qorytyndylady depýtat.
