ءماجىلىس دەپۋتاتى اسحات ايماعامبەتوۆ قازاقستانداعى بيۋدجەت تاپشىلىعىنىڭ نەگىزگى سەبەپتەرى مەن كەمشىلىكتەرىن اتادى، دەپ حابارلايدى Dalanews.kz.
ونىڭ سوزىنشە، بيۋدجەت قاراجاتىن جۇمساۋدا ۇكىمەت پەن قارجى مينيسترلىگىنە بەرىلگەن كەڭ قۇزىرەتتەردىڭ ەسەبى تومەن، ناقتى ەرەجەلەر مەن تالاپتار تولىق انىقتالماعان. ال بۇل ءوز كەزەگىندە قارجىنىڭ ءتيىمسىز ءارى جوسپارسىز جۇمسالۋىنا يتەرمەلەۋدە.
ايماعامبەتوۆتىڭ پىكىرىنشە، ءقازىر ۇكىمەت پارلامەنتتىڭ كەلىسىمىنسىز بيۋدجەتتى جىلىنا 8–10 رەت وزگەرتە الادى.
“ناتيجەسىندە باستاپقىدا بەكىتىلگەن بيۋدجەت پەن ونىڭ ماقساتتارى تۇبەگەيلى وزگەرىستەرگە ۇشىرايدى، ال ماڭىزدى ماسەلەلەر كوپ جاعدايدا كابينەت ىشىندە عانا شەشىلەدى. مۇنداي جاعداي بيۋدجەتتىڭ تيىمدىلىگىنە جانە ەلدىڭ قارجىلىق تۇراقتىلىعىنا كەرى اسەرىن تيگىزۋدە”، - دەدى ول.
دەپۋتات مينيسترلىكتەردىڭ بيۋدجەت باعدارلامالارى اياسىندا قاراجاتتى ءوز بەتىنشە قايتا ءبولۋ مۇمكىندىگىنە دە توقتالدى.
“بۇل ۇدەرىستى رەتتەيتىن ناقتى ەرەجەلەر مەن رەگلامەنتتەر جوق. جاڭا بيۋدجەت كودەكسى جوباسىندا باعدارلامالاردى ىرىلەندىرۋ جانە مينيسترلىكتەرگە ودان دا ۇلكەن دەربەستىك بەرۋ كوزدەلۋدە. الايدا ەسەپ پەن ناقتى مىندەتتەرسىز، بىلىكتى ماماندارسىز جانە مەملەكەتتىك جوسپارلاۋدىڭ ءتيىمدى جۇيەسىنسىز مۇنداي دەربەستىك ءقاۋىپتى بولۋى مۇمكىن. ىشكى ورىنداۋ جانە باقىلاۋ مەحانيزمدەرىن وزگەرتپەي، سىرتقى بلوكتىق قۇرىلىمدى ەنگىزۋ ماسەلەنى شەشپەيدى، كەرىسىنشە، ونى ۋشىقتىرۋى ىقتيمال. ەگەر بۇل ءۇردىس جالعاسا بەرسە، بولاشاقتا پارلامەنتتە ءاربىر مينيسترلىككە جالپى سوما عانا بەكىتىلىپ، ال مينيسترلىكتەر ىشكى قاراجاتتى ءوز قالاۋى بويىنشا بولە بەرەتىن جاعدايعا جەتۋىمىز مۇمكىن. بۇل بيۋدجەتتى بەكىتۋدىڭ ءمانىن جوعالتۋعا اكەلەدى”، - دەپ اتاپ ءوتتى ول.
ايماعامبەتوۆتىڭ ايتۋىنشا، ۇلتتىق قوردان بولىنەتىن ترانسفەرتتەرگە قاتىستى ناقتى تالاپتاردىڭ بولماۋى دا كۇردەلى ماسەلەگە اينالدى.
“ۇلتتىق قوردان كەپىلدەندىرىلگەن ترانسفەرتتەر ۇكىمەتتى شەكتەيتىندەي كورىنگەنىمەن، ءىس جۇزىندە ۇكىمەت سول ترانسفەرتتىڭ تالابىنداعى السىزدىكتەردى پايدالانىپ، ءتۇرلى قارجىلىق قاجەتتىلىكتەر ءۇشىن قاراجاتتى وڭاي تارتا الادى. بولاشاق ۇرپاقتىڭ مۇراسى رەتىندە ساقتالۋعا ءتيىس ۇلتتىق قور بيۋدجەت تاپشىلىعىن جابۋ مەن تيىمسىزدىك ماسەلەلەرىن شەشۋدىڭ باستى كوزىنە اينالىپ وتىر”، - دەدى ول.
اسحات ايماعامبەتوۆتىڭ پىكىرىنشە، بلوك-بيۋدجەت جۇيەسىنىڭ ەنگىزىلۋى مينيسترلىكتەرگە قاراجاتتى بولۋگە ەركىندىك بەرگەنىمەن، ەسەپتىلىكتەن بوساتپاۋ قاجەتتىگىن ەسكەرتەدى.
“بارلىق قۇرىلىمعا تيىمدىلىك كورسەتكىشتەرى ناقتى، تۇسىنىكتى جانە اشىق بولۋى كەرەك. مينيسترلىكتەردىڭ دەربەستىگى مىندەتتى تۇردە پارلامەنت پەن قوعام الدىندا ەسەپ بەرۋمەن قامتاماسىز ەتىلۋى ءتيىس،” – دەيدى ول.
دەپۋتاتتىڭ پىكىرىنشە، جاڭا بيۋدجەت كودەكسى جوباسى بيۋدجەت جۇيەسىنىڭ تۇيتكىلدى ماسەلەلەرىن شەشە الماي وتىر.
“وكىنىشكە قاراي، جاڭا بيۋدجەت كودەكسى جوباسىندا بۇرىنعى كەمشىلىكتەر ساقتالىپ، بيۋدجەت جۇيەسىنىڭ جۇيەلى ماسەلەلەرى شەشىلمەگەن. قازىرگى ۋاقىتتا وسى جانە باسقا دا باعىتتار بويىنشا ۇسىنىلعان تۇزەتۋلەر قىزۋ تالقىلانۋدا. الايدا ۇكىمەتتىڭ قورىتىندىلارىندا كوپتەگەن ورىندى نورمالار قولداۋ تاپپاي وتىر”، - دەپ ءسوزىن قورىتىندىلادى دەپۋتات.
