Májilis tóraǵasy Erlan Qoshanov Májilis depýtattaryn Qoǵamdyq qabyldaý qyzmeti aiasynda halyqpen tyǵyz jumys isteýge shaqyrdy, dep habarlaidy Dalanews.kz.
“Atom elektr stantsiiasyn salatyn jerdi anyqtaý máselesine kelsek, bul jóninde Memleket basshysy depýtattyq korpýstan usynys kútýde. Biz bul taqyrypty jaqsy bilemiz. Qazaqstanda beibit atomdy paidalaný qajettigi týraly buǵan deiin halyqqa túsindirý jumystaryn júrgizdik. Endi stantsiianyń naqty qai jerde salynatynyn salalyq komitetter men Qoǵamdyq palata deńgeiinde sarapshylar men ǵalymdar qatysatyn jiynda talqylaý qajet. Sol talqylaýdyń nátijesinde naqty usynystar ázirleimiz”, – dedi Qoshanov Májilistiń jalpy otyrysynda.
Onyń aitýynsha, barlyq zańnamalyq sheshimder qoǵammen tyǵyz bailanysta qabyldanýy kerek.
“Biz “halyq únine qulaq asatyn memleket” qaǵidasyn basshylyqqa ala otyryp, sailaýshylarmen turaqty qarym-qatynas ornatýǵa tiispiz. Májilistiń qoǵamdyq qabyldaý qyzmeti aiasynda azamattardyń ótinishterine erekshe kóńil bólgen jón. Óitkeni halyqtyń pikiri men múddesi – Memleket basshysynyń saiasatynyń negizi. Sondyqtan ár depýtat óz jumysynda osy ustanymdy basshylyqqa alýy qajet”, – dedi Májilis spikeri.
Aita keteiik, 28 qańtarda Prezident Qasym-Jomart Toqaevtyń qatysýymen Úkimettiń keńeitilgen otyrysy ótti. Memleket basshysy Úkimet pen Parlamentke elde ekinshi atom elektr stantsiiasyn salý úshin naqty oryn usyný týraly tapsyrma bergen bolatyn. Sonymen qatar, bul másele boiynsha qaitadan referendým ótkizilmeitini de atap ótildi.
