ءماجىلىس ءتوراعاسى ەرلان قوشانوۆ ءماجىلىس دەپۋتاتتارىن قوعامدىق قابىلداۋ قىزمەتى اياسىندا حالىقپەن تىعىز جۇمىس ىستەۋگە شاقىردى، دەپ حابارلايدى Dalanews.kz.
“اتوم ەلەكتر ستانسياسىن سالاتىن جەردى انىقتاۋ ماسەلەسىنە كەلسەك، بۇل جونىندە مەملەكەت باسشىسى دەپۋتاتتىق كورپۋستان ۇسىنىس كۇتۋدە. ءبىز بۇل تاقىرىپتى جاقسى بىلەمىز. قازاقستاندا بەيبىت اتومدى پايدالانۋ قاجەتتىگى تۋرالى بۇعان دەيىن حالىققا ءتۇسىندىرۋ جۇمىستارىن جۇرگىزدىك. ەندى ستانسيانىڭ ناقتى قاي جەردە سالىناتىنىن سالالىق كوميتەتتەر مەن قوعامدىق پالاتا دەڭگەيىندە ساراپشىلار مەن عالىمدار قاتىساتىن جيىندا تالقىلاۋ قاجەت. سول تالقىلاۋدىڭ ناتيجەسىندە ناقتى ۇسىنىستار ازىرلەيمىز”، – دەدى قوشانوۆ ءماجىلىستىڭ جالپى وتىرىسىندا.
ونىڭ ايتۋىنشا، بارلىق زاڭنامالىق شەشىمدەر قوعاممەن تىعىز بايلانىستا قابىلدانۋى كەرەك.
“ءبىز “حالىق ۇنىنە قۇلاق اساتىن مەملەكەت” قاعيداسىن باسشىلىققا الا وتىرىپ، سايلاۋشىلارمەن تۇراقتى قارىم-قاتىناس ورناتۋعا ءتيىسپىز. ءماجىلىستىڭ قوعامدىق قابىلداۋ قىزمەتى اياسىندا ازاماتتاردىڭ وتىنىشتەرىنە ەرەكشە كوڭىل بولگەن ءجون. ويتكەنى حالىقتىڭ پىكىرى مەن مۇددەسى – مەملەكەت باسشىسىنىڭ ساياساتىنىڭ نەگىزى. سوندىقتان ءار دەپۋتات ءوز جۇمىسىندا وسى ۇستانىمدى باسشىلىققا الۋى قاجەت”، – دەدى ءماجىلىس سپيكەرى.
ايتا كەتەيىك، 28 قاڭتاردا پرەزيدەنت قاسىم-جومارت توقايەۆتىڭ قاتىسۋىمەن ۇكىمەتتىڭ كەڭەيتىلگەن وتىرىسى ءوتتى. مەملەكەت باسشىسى ۇكىمەت پەن پارلامەنتكە ەلدە ەكىنشى اتوم ەلەكتر ستانسياسىن سالۋ ءۇشىن ناقتى ورىن ۇسىنۋ تۋرالى تاپسىرما بەرگەن بولاتىن. سونىمەن قاتار، بۇل ماسەلە بويىنشا قايتادان رەفەرەندۋم وتكىزىلمەيتىنى دە اتاپ ءوتىلدى.
