Parlament Májilisiniń depýtattary Maqsat Tolyqbaev pen Rinat Zaiytov Kúrshim aýdany, Maraldy aýylynyń halqymen kezdesti. Ashyq dialog túrinde ótken kezdesýde altyn óndirý fabrikasyna qatysty máseleler aityldy.
Jergilikti jurtshylyqty mazalaǵan basty suraq – tsianid. Aýyl turǵyndarynyń keibiri ken óndirý tehnologiiasynda tsianid qospasyn qoldanýǵa qarsy ekendikterin jetkizdi. Himiialyq suiyqtyq qorshaǵan ortaǵa, adam ómirine qaýipti dep esepteidi olar.
Halyq qalaýlylary turǵyndardy alańdatqan tsianid qospasyn fabrika jumysynda qoldanýdyń qorshaǵan ortaǵa ziiany bar-joǵyn anyqtaý úshin komissiia qurý qajettigin jetkizdi.
– Eń birinshi komissiia quryp, fabrikada tsianid qospasyn paidalanýdyń qorshaǵan ortaǵa ziiany bar ma, joq pa sony tekserý kerek. Komissiia quramyna ekologtar men jaýapty ministrlikterdiń ókilderinen bólek jergilikti halyqtyń ishinen belsendi adamdardy qosýdy talap etemiz, - dedi Maqsat Tolyqbaev.
Sonymen qatar turǵyndar biylǵy 8 mamyrda altyn fabrikasy salynyp jatqan jerge basyp kirip, adamdy jaraqattap, kompaniianyń múlkine zalal keltirdi degen aiyppen qamaýǵa alynǵan azamattardy bosatýdy surady. Bul zań organdarynyń quzyryndaǵy is, sondyqtan bári zań aiasynda sheshiletini túsindirildi.
– Bul jaǵdaidyń aq-qarasyn quqyq qorǵaý organdary anyqtap, tiisti sheshim shyǵarady. Biz olardy bosatyńyzdar dep aita almaimyz, óitkeni zań bar. Zańnan biik emespiz, zańǵa baǵynýymyz kerek.
Ekinshi bir másele – ishki kóshi-qon.
Aitalyq, 2001 jyly Maraldy halqynyń sany 1312 bolsa, qazir munda 476 adam turyp jatyr. Al fabrika salynsa kóshi-qon tejelip, jergilikti halyq turaqty jumyspen qamtylyp, aýyldyń damýyna oń yqpaly tieri sózsiz. Ony da eskereiik. Másele aiǵaimen sheshilmeidi, suraqtaryńyzdy naqty dálel keltire otyryp depýtattarǵa joldańyzdar.
Eshqandai dáieksiz fabrika salýǵa qarsymyz deýge bolmaidy ǵoi, másele bar bolsa onyń bárin zańǵa negizdep, naqty dálelder keltirip aitaiyq, – dedi Nurymbet Saqtaǵanov.
Kópshiliktiń fabrika qurylysyn ýaqytsha toqtata turý jónindegi talabyna qatysty da túsinikteme berildi. Oblys ákiminiń birinshi orynbasary kásiporyn qurylysyn toqtatýǵa zańdy negiz bolýy kerektigin jáne ol tek sot arqyly júzege asyrylatynyn túsindirdi.
Maraldynyń mádeniet úiinde ótken jiynnan keiin Májilis depýtattary aýyl turǵyndarymen birge ken óndirý ornyn baryp kórdi.
– Bizdiń Maraldyǵa kelgendegi maqsatymyz osyndaǵy jaǵdaidy kózben kórip, aýyl halqynyń talap-tilegin estip qaitý bolatyn. Biraz dúnie aityldy, kóp jaitqa qanyq boldyq. Endi osylardyń bárin tiisti ministrlikterge jetkizemiz, - dedi Parlament Májilisiniń depýtaty Rinat Zaiytov.
Mádeniet úiindegi jáne kenish basyndaǵy syndarly áńgimeden keiin aýyl turǵyndary Astandan at terletip kelgen depýtattarǵa alǵys aityp, rizashylyqtaryn bildirdi.
Sonymen qatar oblys basshylyǵy tarapynan aýyl ishindegi kóshe joldaryna asfalt tóseý, aýyzsý tartý, áleýmettik nysandardy jóndeý, mekteptiń materialdyq bazasyn nyǵaitý, maraldylyq analardy qalaǵa ákelip meditsinalyq tekserýden ótkizý siiaqty kórsetilip jatqan qoldaý-kómekke bek riza ekendikterin jetkizdi.
Aldaǵy ýaqytta Maraldyda jazda shaǵyn fýtbol, qysta hokkei muz aidyny bolatyn ámbebap sport nysany salynyp, 1,6 shaqyrymǵa jaryq tartylyp jáne basqa da jumystar júzege asyrylatynyn aita ketý kerek.
