ءماجىلىس دەپۋتاتتارى مارالدى حالقىمەن كەزدەستى

جاربول كەنت ۇلى 02 ماۋ. 2024 17:09 2070

پارلامەنت ءماجىلىسىنىڭ دەپۋتاتتارى ماقسات تولىقبايەۆ پەن رينات زايىتوۆ كۇرشىم اۋدانى، مارالدى اۋىلىنىڭ حالقىمەن كەزدەستى. اشىق ديالوگ تۇرىندە وتكەن كەزدەسۋدە التىن ءوندىرۋ فابريكاسىنا قاتىستى ماسەلەلەر ايتىلدى.


جەرگىلىكتى جۇرتشىلىقتى مازالاعان باستى سۇراق – سيانيد. اۋىل تۇرعىندارىنىڭ كەيبىرى كەن ءوندىرۋ تەحنولوگياسىندا سيانيد قوسپاسىن قولدانۋعا قارسى ەكەندىكتەرىن جەتكىزدى. حيميالىق سۇيىقتىق قورشاعان ورتاعا، ادام ومىرىنە ءقاۋىپتى دەپ ەسەپتەيدى ولار.


حالىق قالاۋلىلارى تۇرعىنداردى الاڭداتقان سيانيد قوسپاسىن فابريكا جۇمىسىندا قولدانۋدىڭ قورشاعان ورتاعا زيانى بار-جوعىن انىقتاۋ ءۇشىن كوميسسيا قۇرۋ قاجەتتىگىن جەتكىزدى.


– ەڭ ءبىرىنشى كوميسسيا قۇرىپ، فابريكادا سيانيد قوسپاسىن پايدالانۋدىڭ قورشاعان ورتاعا زيانى بار ما، جوق پا سونى تەكسەرۋ كەرەك. كوميسسيا قۇرامىنا ەكولوگتار مەن جاۋاپتى مينيسترلىكتەردىڭ وكىلدەرىنەن بولەك جەرگىلىكتى حالىقتىڭ ىشىنەن بەلسەندى ادامداردى قوسۋدى تالاپ ەتەمىز، - دەدى ماقسات تولىقبايەۆ.


سونىمەن قاتار تۇرعىندار بيىلعى 8 مامىردا التىن فابريكاسى سالىنىپ جاتقان جەرگە باسىپ كىرىپ، ادامدى جاراقاتتاپ، كومپانيانىڭ مۇلكىنە زالال كەلتىردى دەگەن ايىپپەن قاماۋعا الىنعان ازاماتتاردى بوساتۋدى سۇرادى. بۇل زاڭ ورگاندارىنىڭ قۇزىرىنداعى ءىس، سوندىقتان ءبارى زاڭ اياسىندا شەشىلەتىنى ءتۇسىندىرىلدى.


– بۇل جاعدايدىڭ اق-قاراسىن قۇقىق قورعاۋ ورگاندارى انىقتاپ، ءتيىستى شەشىم شىعارادى. ءبىز ولاردى بوساتىڭىزدار دەپ ايتا المايمىز، ويتكەنى زاڭ بار. زاڭنان بيىك ەمەسپىز، زاڭعا باعىنۋىمىز كەرەك.
ەكىنشى ءبىر ماسەلە – ىشكى كوشى-قون.

ايتالىق، 2001 جىلى مارالدى حالقىنىڭ سانى 1312 بولسا، ءقازىر مۇندا 476 ادام تۇرىپ جاتىر. ال فابريكا سالىنسا كوشى-قون تەجەلىپ، جەرگىلىكتى حالىق تۇراقتى جۇمىسپەن قامتىلىپ، اۋىلدىڭ دامۋىنا وڭ ىقپالى تيەرى ءسوزسىز. ونى دا ەسكەرەيىك. ماسەلە ايعايمەن شەشىلمەيدى، سۇراقتارىڭىزدى ناقتى دالەل كەلتىرە وتىرىپ دەپۋتاتتارعا جولداڭىزدار.

ەشقانداي دايەكسىز فابريكا سالۋعا قارسىمىز دەۋگە بولمايدى عوي، ماسەلە بار بولسا ونىڭ ءبارىن زاڭعا نەگىزدەپ، ناقتى دالەلدەر كەلتىرىپ ايتايىق، – دەدى نۇرىمبەت ساقتاعانوۆ.


كوپشىلىكتىڭ فابريكا قۇرىلىسىن ۋاقىتشا توقتاتا تۇرۋ جونىندەگى تالابىنا قاتىستى دا تۇسىنىكتەمە بەرىلدى. وبلىس اكىمىنىڭ ءبىرىنشى ورىنباسارى كاسىپورىن قۇرىلىسىن توقتاتۋعا زاڭدى نەگىز بولۋى كەرەكتىگىن جانە ول تەك سوت ارقىلى جۇزەگە اسىرىلاتىنىن ءتۇسىندىردى.


مارالدىنىڭ مادەنيەت ۇيىندە وتكەن جيىننان كەيىن ءماجىلىس دەپۋتاتتارى اۋىل تۇرعىندارىمەن بىرگە كەن ءوندىرۋ ورنىن بارىپ كوردى.


– ءبىزدىڭ مارالدىعا كەلگەندەگى ماقساتىمىز وسىنداعى جاعدايدى كوزبەن كورىپ، اۋىل حالقىنىڭ تالاپ-تىلەگىن ەستىپ قايتۋ بولاتىن. ءبىراز دۇنيە ايتىلدى، كوپ جايتقا قانىق بولدىق. ەندى وسىلاردىڭ ءبارىن ءتيىستى مينيسترلىكتەرگە جەتكىزەمىز، - دەدى پارلامەنت ءماجىلىسىنىڭ دەپۋتاتى رينات زايىتوۆ.


مادەنيەت ۇيىندەگى جانە كەنىش باسىنداعى سىندارلى اڭگىمەدەن كەيىن اۋىل تۇرعىندارى استاندان ات تەرلەتىپ كەلگەن دەپۋتاتتارعا العىس ايتىپ، ريزاشىلىقتارىن ءبىلدىردى.


سونىمەن قاتار وبلىس باسشىلىعى تاراپىنان اۋىل ىشىندەگى كوشە جولدارىنا اسفالت توسەۋ، اۋىزسۋ تارتۋ، الەۋمەتتىك نىسانداردى جوندەۋ، مەكتەپتىڭ ماتەريالدىق بازاسىن نىعايتۋ، مارالدىلىق انالاردى قالاعا اكەلىپ مەديسينالىق تەكسەرۋدەن وتكىزۋ سياقتى كورسەتىلىپ جاتقان قولداۋ-كومەككە بەك ريزا ەكەندىكتەرىن جەتكىزدى.

الداعى ۋاقىتتا مارالدىدا جازدا شاعىن فۋتبول، قىستا حوككەي مۇز ايدىنى بولاتىن امبەباپ سپورت نىسانى سالىنىپ، 1،6 شاقىرىمعا جارىق تارتىلىپ جانە باسقا دا جۇمىستار جۇزەگە اسىرىلاتىنىن ايتا كەتۋ كەرەك.


ۇسىنىلعان
سوڭعى جاڭالىقتار