Burynǵy bilim ministri, qazirgi depýtat Ashat Aimaǵambetov el azamattary men ekonomika úshin mańyzdy ról atqaratyn, jańa Salyq kodeksine engizgen keibir usynystarǵa (qazirgi tańda olar jumys toby deńgeiinde talqylanýda) qysqasha toqtaldy, dep jazady Dalanews.kz.
Depýtat bul týraly Telegram-daǵy arnasynda jazdy.
- Qumar oiyndarǵa salynatyn salyqty kóbeitý.
Qumar oiyn biznesi, ásirese býkmekerlik keńseler, aitarlyqtai qarjylyq áleýetke ie. Qazirgi Salyq kodeksi jobasynda salyq mólsheri 10% deńgeiinde qarastyrylǵan. Iá, bul qazirgi deńgeiden birneshe ese joǵary, biraq biz ony eki esege arttyryp, 20%-ǵa deiin kóterýdi usyndyq. Bul biýdjetke qosymsha júzdegen milliard teńge túsim ákelýi múmkin.
2. Bankter úshin KTS mólsherlemesin arttyrý.
Úkimet jobasynda bankter úshin korporativti tabys salyǵy (KTS) 25% deńgeiinde belgilengen. Biraq biz bul mólsherlemeni 30%-ǵa deiin kóterýdi usyndyq. Bul ádil shara, sebebi bank sektorynyń paidasy óte joǵary. Ásirese, qarjylyq qyzmetterdiń qymbattaýy men dividendterdiń birneshe ese ósýin eskersek. Bul biýdjetke qosymsha tabys ákeledi.
3. Alkogol jáne transmailarǵa aktsiz engizý.
Alkogol. Alkogoldik ónimder birinshi qajettilikke jatpaityn taýar bolǵandyqtan, oǵan aktsizderdi arttyrý qisyndy dep sanaimyz.
Transmailar. Transmailar — arzan, biraq óte ziiandy, kantserogendik zattar. Olardy tamaq ónerkásibinde keńinen qoldanady. Kóptegen Eýropa elderiniń tájiribesin eskere otyryp, biz transmailarǵa aktsiz engizýdi usyndyq. Bul olardyń qoldanylýyn azaitýǵa jáne óndirýshilerdi tabiǵi mailarǵa kóshýge yntalandyrýǵa múmkindik beredi. Sondai-aq, bul biýdjetke qosymsha tabys ákeledi.
4. Dári-dármekter men meditsinalyq qyzmetterge QQS (NDS) engizýge qarsy túzetý.
Dári-dármekter. Dári-dármekterge QQS (NDS) engizý durys emes, sebebi bul eń osal toptarǵa — zeinetkerlerge, balalarǵa jáne múmkindigi shekteýli jandarǵa tikelei áser etedi. Olai bolsa, dári-dármekter baǵasy aitarlyqtai qymbattaidy. Biz dári-dármekterdi QQS-tan bosatýdy kózdeitin qoldanystaǵy normany saqtap qalýdy usyndyq.
Meditsinalyq qyzmetter. QQS engizý azamattar úshin, ásirese zeinetkerler men múgedekter úshin emdeý qunyn arttyrady. Bul jaǵdai qoljetimdiligi shekteýli meditsinalyq qyzmetterdi odan ári qiyndatady. Sonymen qatar, biz meditsinalyq qyzmetter úshin KTS mólsherlemesin tómendetýdi usyndyq (qoldanystaǵy kodekste olar KTS tólemeidi).
5. Bank operatsiialaryna QQS (NDS) engizýdi boldyrmaý.
Úkimettiń banktik aýdarymdar men basqa da bank operatsiialaryna QQS engizý usynysy aqylǵa qonymsyz. Qazirdiń ózinde bankter arasyndaǵy aýdarymdar quny, QQS engiziledi degen boljammen, ósip jatyr (mysaly, Halyq banktiń kartasynan basqa bankterge aýdarym 150 teńgeden 200 teńgege deiin qymbattady). QQS qosylsa, bul bankterdiń emes, qarapaiym azamattardyń shyǵyndaryn odan ári arttyrady. Biz bul normany qabyldamaýdy jáne negizgi qarjylyq qyzmetterdiń baǵasynyń ósýine jol bermeýdi usyndyq.
6. Endaýment qorlaryna qatysty túzetýler.
Endaýment qorlary áleýmettik jáne bilim berý salasyndaǵy uzaq merzimdi jobalardy qarjylandyrýda mańyzdy ról atqarady. Biz qaiyrymdylyqqa jumsalǵan somalardy salyqtan bosatýdy usyndyq. Bul azamattar men kompaniialardy qaiyrymdylyqqa qatysýǵa yntalandyrady.
7. B2B mámilelerine arnaiy salyq rejimi boiynsha mólsherlemeni ózgertpeý.
Biz mólsherlemeni 12%-dan 8%-ǵa deiin tómendetýdi usyndyq. Bul másele biznestiń pikirtalastarynda, sonyń ishinde Májilis janyndaǵy Qoǵamdyq palatanyń múshelerimen kezdesýlerde jii kóterildi.
Shyǵyndardy ońtailandyrý.
Salyqty kóbeitý shyǵyndar qurylymyn qaita qaraýsyz múmkin emes. Eger biýdjet kirisimen bailanysty problemalar aiqyn bolsa, basymdyqqa ie emes shyǵyndardy ońtailandyrý logikalyq qadam bolady. Memleket basshysy bul týraly buǵan deiin de tapsyrma bergen.
Memlekettik organdarǵa ákimshilik ǵimarattar salý, úlken stadiondar men kontsert zaldaryn turǵyzý, imidjdik sharalar men forýmdar ótkizý shyǵyndaryn qysqartý qajet.
Depýtat bul ózderi usynǵan usynystarynyń tek bir bóligi ǵana ekenin, salyqtyq jeńildikterdi qysqartý týraly jáne basqa da usynystary, bul jazbanyń jalǵasy baryn eskertedi.
