Astanadaǵy Dent-Park jeke klinikasynda 3 jasar qyz tisin emdeý kezinde anesteziiadan keiin oianbai, kóz jumdy. Oqiǵa 2024 jyldyń 30 qazanynda bolǵan. Qazir bul fakti boiynsha sot protsesi ótip jatyr, dep habarlaidy Dalanews.kz Azattyq Ryhy-na silteme jasap.
Qaraly otbasynyń aitýynsha, klinika mamandary bir protsedýrada balanyń 20 tisiniń 18-in emdeýge tyrysqan. Bul — meditsinalyq standartqa qaishy sheshim.
Marqumnyń ákesi Talǵat Qumarovtyń aitýynsha, qyzdyń tisi Sevoran preparaty arqyly jalpy anesteziiamen emdelgen.
«Aldyńǵy protsedýra da 3,5 saǵattan uzaqqa sozylǵan edi, qyzym anesteziiadan keiin esin jimady. Ol kezde de kúmán boldy. Keiin Farmatsevtikalyq baqylaý eleýli buzýshylyqtardy anyqtady», – deidi Qumarov.
Ata-ananyń aitýynsha, sedatsiia tańǵy 09:10-da bastalǵan. 14:00 shamasynda balanyń ákesine áieli habarlasyp, qyzdyń oianbai jatqanyn aitqan. Jedel járdem shaqyrylyp, 40–45 minýt reanimatsiialyq sharalar jasalǵanymen, búldirshin qaitys bolǵan. Dárigerler balanyń júregi toqtap, miy isingenin jetkizgen.
Otbasynyń advokaty Rýslan Aitjanovtyń sózinshe, klinikada meditsinalyq standarttar saqtalmaǵan.
«Eger dárigerler barlyq tisti birden emdeýge tyryspasa, bala aman qalýy múmkin edi. Eki saraptama — sapany baqylaý departamenti men keshendi sot saraptamasy — anesteziolog pen stomatologtyń kinásin kórsetken», – deidi advokat.
Alaida is boiynsha tek anesteziolog qana tergelgen. Protsedýraǵa qatysqan stomatolog áli de klinikada jumys isteidi.
Klinika direktory Nadejda Hon anesteziologtyń oqiǵadan keiin jumystan ketkenin rastady. Alaida stomatolog óz qyzmetin jalǵastyryp jatyr.
«Biz anesteziia mamanyn jumystan shyǵardyq. Saraptama qorytyndysyn kútemiz», – dedi klinika basshysy.
Al sotta bolǵan anesteziolog Jumaǵalieva jýrnalisterge túsinikteme berýden bas tartty.
Tergeý barysynda kelesi faktiler belgili bolǵan:
-
Anesteziolog sońǵy ret 2019 jyly biliktiligin arttyrǵan jáne balalar anesteziologiiasynda talap etiletin 7 jyldyq tájiribesi joq;
-
Klinikada merzimi ótken nemese sertifikaty joq dáriler saqtalǵan;
-
Dárigerler balalarda uzaq sedatsiia kezinde meditsinalyq standarttardy óreskel buzǵan.
Jábirlenýshi tarap jeke klinikalardaǵy uzaq anesteziia qoldaný tájiribesin qaita qaraýdy, al kishkentai balalardyń tisin bir ýaqytta tolyq emdeý praktikasyn toqtatýdy suraidy.
Anesteziologtyń advokaty sotqa kele almaǵandyqtan, is kelesi otyrysqa shegerildi.
