Erteńnen bastap turǵyndarǵa josparly shekteýler boıynsha aldyn ala habarlanatyn bolady. Bul týraly Mańǵystaý oblysy Qoǵamdyq komýnıkasıa ortalyǵynda ótken brıfıńte aımaq basshysynyń birinshi orynbasary Jumabaı Qaraǵaev aıtty.
Óńirdegi eldi mekenderdi birkelki jabdyqtaýdy qamtamasyz etý úshin ýaqytsha ajyratýlardy "tıimdi" ádispen júrgizý josparlanǵan. Bul belgili bir aımaqqa sáıkes tutynylatyn energıa kólemin azaıtý maqsatynda, tutynýshylar úshin elektr qýaty 3-ten 5 saǵatqa deıin sıkldik túrde óshetinin bildiredi. Turmystyq energıa tutynýshylarǵa josparlanǵan úzilister aldyn-ala habarlanatyn bolady.
«MAEK» JSHS-de elektr energıasynyń jalpy óndiris qýattylyǵy 545 MVt quraıdy. Alaıda, eki elektr stansıasyndaǵy energetıkalyq blogtardyń májbúrli toqtaýyna baılanysty óndiris qýattylyǵy qazirgi tańda 245 MVt-qa deıin qysqarǵan.
Osy oraıda aımaq basshylyǵy memlekettik organdar jáne komýnaldyq qyzmet ókilderimen birge eń aldymen áleýmettik obektilerdi elektr energıasymen qamtamasyz etý boıynsha jedel shtab qurdy.
- Oblys basshylyǵynyń tóraǵalyǵymen qurylǵan jedel shtabqa ýákiletti memlekettik organdar men komýnaldyq qyzmet ókilderi kirdi. Olar elektr energıasyn óshirý birinshi kezekte ónerkásiptik obektilerge áser etetini týraly sheshim qabyldady. Bul sheshim turmystyq energıa tutynýshylaryna yńǵaısyzdyq týdyrmaý úshin qabyldanyp otyr. Keıbir ken oryndary generatorlarmen jabdyqtalǵan, al basqala nysandarda jaǵdaı qıynyraq. Sonymen qatar, aýrýhanalar, balabaqshalar sıaqty áleýmettik nysandar elektr qýatymen qamtamasyz etiletin bolady. Biz turǵyndardan arandatýshylyqqa boı aldyrmaýdy, tek resmı derekkózderge senýdi suraımyz, - dedi «Mańǵystaý óńirlik elektr jelisi kompanıasy» AQ basqarma tóraǵasy Qasymhan Syzdyqov.
Jedel shtab otyrysynda tótenshe jaǵdaı rejımin engizý týraly másele qaraldy.
- TJ engizý týraly másele qaralýda. Ázirge bul shara tıisti nátıje bermeıdi dep esepteımiz, óıtkeni TJ rejımi tek memlekettik satyp alýǵa qatysty shekteýler engizýge múmkindik beredi. Oryn alǵan jaǵdaıda bizdi júıelik operator - «KEGOC» AQ qoldap otyr, ol bizge 80 mVt - qa deıin alýǵa kómektesedi, - dep túsindirdi Jumabaı QARAǴAEV.
Qazirgi ýaqytta jedel shtab óńirde elektr energıasyn berýdi jedel qalpyna keltirý boıynsha jumys isteýde jáne kombınat qyzmetkerleri tolyqtaı kúsh salýda.
- «MAEK»-tegi apat joıylǵanǵa deıin óńir turǵyndaryn osy jaǵdaıǵa túsinistikpen qaraýǵa, elektr energıasyn únemdi tutynýǵa shaqyramyn. Komýnaldyq qyzmet mamandary kúndiz-túni energıa bloktarynyń jumysyn tez qalpyna keltirý úshin jumys atqarýda. Búgin biz «tıimdi» óshirýdiń eń joǵary júktemelerin synaqtan ótkizip jatyrmyz, erteńnen bastap turǵyndarǵa barynsha yńǵaıly bolý úshin, eldi mekenderdi ajyratý kestesin aldyn-ala usynatyn bolamyz, - dep qorytyndylady Jumabaı Qaraǵaev.
