Rasynda da sońǵy jyldary Mádenıet mınıstrligi toı ótkizetin agenttikke uqsap ketkeni jasyryn emes. Kezinde mádenıet salasyn Arystanbek Muhamedıauly basqarǵan tusta kóptegen merekeler paıda bolyp, toı-dýmannan kóz ashpaı qaldyq emes pe? Endi osynyń bárin toqtatý kerek.
Búginde mereke kezinde elimizde medal men ataqtardy alýdan úlken jarys ótip jatqandaı áserde qalasyń.
Nesin aıtasyz, Nazarbaev bıligi eldiń nazaryn basqa jaqqa burý úshin jasandy merekeler men medalderdi oılap taýyp, jurttyń mıyn atala qylǵanyn jasyryp qaıtemiz.
Dál osy kezeńde oblys pen aýdannyń «Qurmetti azamaty» degen ataqtar toıda jyrtys taratylǵandaı beriletin ádet qalyptasty. Týǵan jerine qaıyrymy joq, talaı adam «Qurmetti azamaty» bolý úshin áke-kókesin araǵa salyp, qolyndaǵy baryn «másele sheshkish» kókelerge oılanbastan ustata salatyn kúıge tústi.
Osyndaı kók tıyndyq quny joq ataqtar halyqtyń minez-qulqyn buzyp, ataqty alý men berý qyp-qyzyl saýdaǵa aınalǵanyn bilemiz.
Ataq pen medal alý jemqorlyqtyń tamyryn tereńge jaıýyna yqpal etkenine kýá boldyq.
Eger «Ertegiler elinen» Mystan kempir ǵaıyptan taıyp, Qazaqstanǵa kelip, sulýlyq baıqaýyna qatysyp, «Qazaqstan arýy» atanyp jatsa eshkim tańqalmas edi. Solaı, aıǵaıyn! Osy deńgeıge deıin quldyraǵanymyzǵa kóz juma qaraýymyz uıat.
Áıteýir elimizdiń Joǵarǵy aýdıt palatasynyń qyzmetkerleri birinshi bolyp es jıypty. Olar QR Mádenıet jáne sport mınıstrligi ataq pen medalderge jumsalatyn shyǵynyn qysqartýdy talap etip otyr. Durys bastama dep esepteımiz. Mınıstrlik medalder men maqtaý qaǵazdaryna jáne ıyqqa jabatyn shapandarǵa jyl saıyn 42,2 mln teńge shyǵyndaýdy jón sanapty.
Parlamentten osyǵa aqsha suraı kelgen mınıstrlik ókilderi ózderiniń 2023-2025 jyldarǵa arnalǵan búdjetinde medal, dıplom men kýboktar ázirleýge memleket qazynasynan 126,5 mln teńge alýdy kózdegen ǵoı.
Biraq Joǵara aýdıt palatasynyń ókilderi munshama medalder men kýboktardy alatyn mádeneıt qyzmetkerleri men sportshylardyń joq ekenin alǵa tartyp, toqtaý salǵandaı bolypty.
Kúni keshe ǵana Mádenıet jáne sport mınıstri bolyp taǵaıyndalǵan Ashat Oralov oılanýy kerek. Mádenıet mınıstrligin ataq pen medal taratatyn organǵa aınaldyrmaýy kerek.
