2025 jyldyń 18-21 mamyr aralyǵynda Astanada Mádeniet jáne óner qyzmetkerleriniń forýmy ótti. Oǵan elimizdiń barlyq óńirinen, sonymen qatar sheteldik mádeni jáne shyǵarmashylyq qaýymdastyqtardan kelgen 700-den astam adam qatysty. Aýqymdy is-shara 21 mamyr – Mádeniet jáne óner qyzmetkerleriniń kásibi merekesine orai uiymdastyryldy.
Saltanatty jiyn barysynda forým qatysýshylaryn Qazaqstan Respýblikasy Premer-ministriniń orynbasary Ermek Kósherbaev quttyqtap, Memleket basshysynyń atynan birqatar memlekettik nagradalardy tabystady.
«Qurmet» ordenimen Nurǵisa Tilendiev atyndaǵy «Otyrar sazy» akademiialyq folklorlyq-etnografiialyq orkestriniń ártisi Larisa Nasretdinova marapattaldy.
«Eren eńbegi úshin» medalimen «Mezzo» vokaldyq tobynyń solisteri — Asan Nurbergenov, Jánibek Seidahmetov, Jasulan Sydyqov, Medet Orymbaev, sondai-aq Respýblikalyq akademiialyq nemis drama teatrynyń ártisi Timýr Bondank marapattaldy.
«Shapaǵat» medali Natalia Sats atyndaǵy Memlekettik akademiialyq orys balalar men jasóspirimder teatrynyń pedagogika bóliminiń meńgerýshisi Sáýle Bainietovaǵa tabystaldy.
«Qazaqstannyń eńbek sińirgen qairatkeri» qurmetti ataǵy Kúlásh Baiseiitova atyndaǵy daryndy balalarǵa arnalǵan respýblikalyq mýzyka mektep-internatynyń pedagogy Kúlásh Moldaǵalievaǵa jáne Sábit Muqanov atyndaǵy memlekettik qazaq mýzykalyq-drama teatrynyń direktory Birjan Jalǵasbaevqa berildi.
Buǵan deiin Memleket basshysy el mádenietin damytýǵa sińirgen eńbegi úshin kórnekti mádeniet jáne óner qairatkerlerine memlekettik nagradalar tabystap, olardyń ult rýhaniiatyna qosqan zor úlesin atap ótken bolatyn. Aqordada ótken saltanatty jiyn barysynda Qasym-Jomart Toqaev memleket mádeniet pen óner salasynyń damýyna árdaiym airyqsha kóńil bóletinin sóz etti. Óitkeni bul salalardyń deńgeii el rýhaniiatynyń damýymen tyǵyz bailanysty.
Aita keteiik, Astanada ótken Forým aiasynda 20-dan astam taqyryptyq sessiia men paneldik pikirtalas uiymdastyryldy. Olarǵa salalyq ministrlikterdiń ókilderi, sarapshylar, mádeniet qairatkerleri jáne Frantsiia, Qytai, Italiia, Túrkiia, Ońtústik Koreia, Ózbekstan, Resei syndy elderden kelgen sheteldik spikerler qatysty.
Bilim berý baǵyty boiynsha 30-dan astam is-shara uiymdastyryldy. Onda qatysýshylar mýzei menedjmenti men teatr ónerinen bastap, tsifrlyq tehnologiialar men mádeni marketingke deiingi birqatar mańyzdy máselelerdi talqylady.
Forým aiasynda Qazaqstan mýzeileriniń kongresi de ótti. Onda ekspozitsiialyq qyzmettiń jańa formalaryn engizi, tsifrlandyrý jáne kórermenmen ózara bailanys ornatý joldary sóz boldy.
Forým memlekettik mádeni saiasattyń basym baǵyttaryn aiqyndaityn, kreativti indýstriiany damytý, materialdyq emes murany saqtaý jáne halyqaralyq mádeni yntymaqtastyqty nyǵaitý máseleleri talqylanǵan negizgi alańǵa ainaldy.
Aýqymdy is-sharanyń qorytyndysy saltanatty gala-kontsertpen túiindeldi.
