Biyl memleket jáne qoǵam qairatkeri Altynbek Sársenbaevtyń, onyń oqqaǵary Baýyrjan Baibosynovtyń jáne júrgizýshisi Vasilii Jýravlevtiń qaza tapqanyna 20 jyl toldy. Osy dataǵa orai saiasatkerdiń týystary jańa málimdeme jasap, isti qaita qaraý máselesin kóterdi, dep dalanews.kz tilshisi Malim.kz saityna silteme jasap habarlaidy.
Sársenbaevtyń jaqyndary Qazaqstan Respýblikasynyń Bas prokýroryna qylmystyq isti "jańadan ashylǵan mán-jailar" negizinde qaita jandandyrý týraly ótinish joldaǵan.
Ótinish mátininde tergeý men sot talqylaýy barysynda birqatar óreskel zańbuzýshylyqtar ketkeni, sondai-aq kei mańyzdy jaittarǵa tiisti quqyqtyq baǵa berilmegeni aitylǵan.
Qujatta is materialdaryna qatysy bar delinetin aýdiojazbaǵa da silteme jasalǵan. Ótinish avtorlarynyń málimetinshe, jazbada Nursultan Nazarbaevqa tiesili delinetin "is boiynsha bári dáleldengen, alańdaýdyń qajeti joq, bir aidan keiin sotqa beriledi, halyq búgin aitady da, erteń umytady" degen mazmundaǵy sózder keltiriledi.
Sársenbaevtyń týystary bul jait sot úkiminiń aldyn ala aiqyndalǵan bolýy múmkin degen kúdik týǵyzatynyn alǵa tartady.
"Iaǵni sot bastalǵanǵa deiin bir ai buryn sheshim qabyldanyp qoiǵan, al sot protsesi tek qoǵam úshin uiymdastyrylǵan kórinis bolǵan", – delingen málimdemede.
Sonymen qatar ótinishte Qazaqstannyń Tuńǵysh Prezidentinen jaýap alý qajettigi atap ótilgen.
"Atalǵan aýdiojazbanyń ózi úkimdi qaita qaraýǵa negiz bola alady. Osy másele boiynsha Nazarbaev N.Á. jaýapqa tartylýy tiis", – deidi ótinish ieleri.
Sársenbaevtyń jaqyndary bul qylmysty «saiasi terror aktisi» dep baǵalap, eks-prezidenttiń otbasy múshelerin qylmystyq jaýapkershilikke tartý máselesin de kótergen.
