Oqý-aǵartý ministri Ǵani Beisembaev litsenziiasyz jumys istegen mektepterge qatysty pikir bildirdi. Onyń aitýynsha, buǵan deiin elimizde 66 mektep tiisti ruqsat qujattarynsyz jumys istep kelgen. Búginde olardyń tek 18-i ǵana qalǵan, dep habarlaidy Dalanews.kz.
“Osy 18 mektepti jańa oqý jyly bastalǵanǵa deiin talapqa sai etý úshin barlyq jergilikti atqarýshy organdar úlken jumys júrgizip jatyr. Óitkeni litsenziia alý máselesi balalarǵa sapaly bilim berýdi qamtamasyz etýdiń mańyzdy sharty”, — deidi ol.
Ǵani Beisembaevtyń aitýynsha, litsenziiasy joq mektepter qatarynda jekemenshik bilim berý uiymdary da bar.
“Qazirgi tańda osy 18 mekteptiń ishinde keibir jekemenshik mektepterdiń de bar ekenin kórip otyrmyz. Siz atap ótken jekemenshik mektepterdiń biri de litsenziiasy áli rásimdelmegen bilim berý uiymdarynyń qatarynda. Bul — barlyǵyna ortaq zań talaptary. Eger ol talaptar oryndalmasa, balalarǵa sapaly bilim berý, qaýipsiz ári qolaily orta qalyptastyrý múmkin bolmaidy. Sondyqtan bul másele boiynsha jumysty odan ári jalǵastyramyz”, — dep qosty ol.
Ministr mundai jaǵdaidyń týýyna jyl saiyn iske qosylatyn jańa mektepterdiń kóptigi áser etýi múmkin ekenin aitty.
“Byltyr osyndai 66 mektep tirkelgen. Ózderińiz bilesizder, biz jyl saiyn 200-den astam jańa mektepti iske qosyp otyrmyz. Osyndai qarqyndy qurylys jaǵdaiynda jergilikti ákimdikter nemese jekemenshik mektepter keide litsenziia rásimdeý protsesine úlgermei jatatyny baiqalady”, — dedi ol.
Osyǵan bailanysty ministrlik zańnamaǵa ózgerister engizýdi josparlap otyr.
“Endi litsenziia almas buryn mektepterdiń barlyǵy aldyn ala tolyq daiyndyqtan ótýi tiis bolady. Osylaisha, mundai máseleler kelesi jyldary qaitalanbas úshin naqty sharalar qabyldanyp jatyr”, — dep qosty ol.
