وقۋ-اعارتۋ ءمينيسترى عاني بەيسەمبايەۆ ليسەنزياسىز جۇمىس ىستەگەن مەكتەپتەرگە قاتىستى پىكىر ءبىلدىردى. ونىڭ ايتۋىنشا، بۇعان دەيىن ەلىمىزدە 66 مەكتەپ ءتيىستى رۇقسات قۇجاتتارىنسىز جۇمىس ىستەپ كەلگەن. بۇگىندە ولاردىڭ تەك 18ء-ى عانا قالعان، دەپ حابارلايدى Dalanews.kz.

“وسى 18 مەكتەپتى جاڭا وقۋ جىلى باستالعانعا دەيىن تالاپقا ساي ەتۋ ءۇشىن بارلىق جەرگىلىكتى اتقارۋشى ورگاندار ۇلكەن جۇمىس جۇرگىزىپ جاتىر. ويتكەنى ليسەنزيا الۋ ماسەلەسى بالالارعا ساپالى ءبىلىم بەرۋدى قامتاماسىز ەتۋدىڭ ماڭىزدى شارتى”، — دەيدى ول.

عاني بەيسەمبايەۆتىڭ ايتۋىنشا، ليسەنزياسى جوق مەكتەپتەر قاتارىندا جەكەمەنشىك ءبىلىم بەرۋ ۇيىمدارى دا بار.

“قازىرگى تاڭدا وسى 18 مەكتەپتىڭ ىشىندە كەيبىر جەكەمەنشىك مەكتەپتەردىڭ دە بار ەكەنىن كورىپ وتىرمىز. ءسىز اتاپ وتكەن جەكەمەنشىك مەكتەپتەردىڭ ءبىرى دە ليسەنزياسى ءالى راسىمدەلمەگەن ءبىلىم بەرۋ ۇيىمدارىنىڭ قاتارىندا. بۇل — بارلىعىنا ورتاق زاڭ تالاپتارى. ەگەر ول تالاپتار ورىندالماسا، بالالارعا ساپالى ءبىلىم بەرۋ، ءقاۋىپسىز ءارى قولايلى ورتا قالىپتاستىرۋ مۇمكىن بولمايدى. سوندىقتان بۇل ماسەلە بويىنشا جۇمىستى ودان ءارى جالعاستىرامىز”، — دەپ قوستى ول.

مينيستر مۇنداي جاعدايدىڭ تۋۋىنا جىل سايىن ىسكە قوسىلاتىن جاڭا مەكتەپتەردىڭ كوپتىگى اسەر ەتۋى مۇمكىن ەكەنىن ايتتى.

“بىلتىر وسىنداي 66 مەكتەپ تىركەلگەن. وزدەرىڭىز بىلەسىزدەر، ءبىز جىل سايىن 200-دەن استام جاڭا مەكتەپتى ىسكە قوسىپ وتىرمىز. وسىنداي قارقىندى قۇرىلىس جاعدايىندا جەرگىلىكتى اكىمدىكتەر نەمەسە جەكەمەنشىك مەكتەپتەر كەيدە ليسەنزيا راسىمدەۋ پروسەسىنە ۇلگەرمەي جاتاتىنى بايقالادى”، — دەدى ول.

وسىعان بايلانىستى مينيسترلىك زاڭناماعا وزگەرىستەر ەنگىزۋدى جوسپارلاپ وتىر.

“ەندى ليسەنزيا الماس بۇرىن مەكتەپتەردىڭ بارلىعى الدىن الا تولىق دايىندىقتان ءوتۋى ءتيىس بولادى. وسىلايشا، مۇنداي ماسەلەلەر كەلەسى جىلدارى قايتالانباس ءۇشىن ناقتى شارالار قابىلدانىپ جاتىر”، — دەپ قوستى ول.