Qarjy mınıstri Mádı Tákıev BAQ ókilderiniń memlekettik qaryz týraly qoıǵan suraǵyna jaýap berdi, dep habarlaıdy Dalanews.kz.
“Qazirgi tańda memlekettik qaryz 30,5 trln teńgeni qurady. Bul — jalpy ishki ónimniń 22,6 paıyzy”, — dedi mınıstr.
Aıtýynsha, bekitilgen lımıt boıynsha memlekettiń qaryzy JİÓ-ge shaqqanda 32 paıyzdan aspaýy qajet.
“Bul turǵyda biz lımıtten asqan joqpyz”, - dep naqtylady ol.
Eske salaıyq, Buzyq telegram-arnasy Qazaqstannyń qarjy ahýalyn zerttep, elde qansha aqsha bar ekenin jáne álemge qansha qaryz ekenin anyqtaǵan bolatyn. Zertteýge Ulttyq banktiń mamandary Murat Erkinálıev pen Zabıra Kamaldınova atsalysqan.
Derekkóz málimetinshe, Ulttyq qordaǵy eń joǵary soma 2014 jyly tirkelgen. Ol kezde $77,2 mlrd jınaqtalǵan eken.
“2024 jyldyń qarashasyndaǵy jaǵdaı boıynsha Ulttyq qorda $60,7 mlrd saqtalǵan. Bul – keıingi urpaqqa qalatyn mura. Sońǵy 10 jylda Ulttyq qordaǵy qarjy $16,5 mlrd-qa azaıǵan. Bıyl Ulttyq qordan búdjet qajettilikterine ₸5,6 trln ($11,2 mlrd) bólingenimen, qaıtarylǵan qarjy aıtarlyqtaı az. Bul másele depýtattar talqylaýyna túsken. Degenmen Qazaqstanǵa qaryz elder de bar”, — deıdi derekkóz.
Memlekettik qaryzdyń qazirgi jaǵdaıy
Qazaqstannyń syrtqy memlekettik qaryzy $12,9 mlrd-qa jetken.
“Memlekettik qaryz syrtqy jáne ishki bolyp ekige bólinedi. İshki qaryz – memlekettiń qazaqstandyqtarǵa bereshegi. Al syrtqy qaryz – sheteldik nesıe berýshiler aldyndaǵy mindettemeleri. Qazirgi syrtqy memlekettik qaryz kólemi – $12,9 mlrd. Qazaqstan qaryzdyń basym bóligin Ulybrıtanıa, Lúksembýrg, Reseı jáne halyqaralyq uıymdardan alǵan. Alaıda basqa memleketter de bizge qaryz. Ári olardyń qaryzy bizdiń qaryzymyzdan áldeqaıda kóp”, — deıdi olar.
Aıtýlarynsha, Qazaqstannyń syrtqy aktıvteri kem degende $98,5 mlrd-qa teń. Bul eldiń halyqaralyq qarjylyq mindettemelerin óteı alatynyn kórsetedi.
“Al endi jalpy syrtqy qaryzǵa kelsek, onyń kólemi – $166,6 mlrd. Biraq munda memlekettik qaryzdan bólek, bankterdiń, jeke kompanıalardyń jáne basqa uıymdardyń qaryzdary kiredi”, — dedi olar.
