Belarýs prezidenti Aleksandr Lýkashenko Ýkraina basshysy Vladimir Zelenskiige qatysty buryn aitqan syn pikirleri úshin keshirim suraýǵa daiyn ekenin málimdedi, dep habarlaidy dalanews.kz.
Al Arabiya telearnasyna bergen suhbatynda Lýkashenko eger onyń sózderi Zelenskiidiń kóńiline tigen bolsa, keshirim suraýǵa qarsy emes ekenin jetkizdi. Onyń aitýynsha, soǵys jaǵdaiynda júrgen memleket basshysyna qatysty mundai sipattaǵy málimdeme jasamaǵany durys bolar edi. Sonymen qatar, Belarýs basshysy ýkrainalyq tarap ta Minsktiń ustanymyn túsinýge tiis dep esepteitinin aitty.
Suhbat barysynda Lýkashenko Belarýstiń Ýkrainamen áskeri qaqtyǵysqa barýǵa múddeli emes ekenin de atap ótti. Onyń pikirinshe, soǵys jaǵdaiynda el aýmaǵyndaǵy strategiialyq mańyzy bar óndiristik kásiporyndar, kólik-logistikalyq toraptar men infraqurylym nysandary negizgi nysanaǵa ainalýy múmkin.
Belarýs prezidenti sondai-aq ýkrainalyq áskeriler respýblika aýmaǵyndaǵy birneshe júzdegen nysandy yqtimal soqqy obektisi retinde belgilegeni týraly aqparat bar ekenin málimdedi.
Aita keteiik, buǵan deiin, 31 mamyr kúni Lýkashenko Ýkraina tarapynyń Belarýstegi 500 nysanaǵa qatysty málimdemesine jaýap berip, Vladimir Zelenskii týraly ótkir pikir bildirgen bolatyn. Sol kezde ol Ýkraina prezidentiniń áreketterin synap, onyń jaǵdaiyna qatysty mysqylmen pikir aityp, "birdeńe shegip nemese ine saldyryp alǵan bolýy múmkin" dep aitqan edi.
