Qazaqstan kinematografister odaǵy ulttyq kinoóndiristiń qazirgi ahýalyna alańdaýshylyq bildirip, bilikke arnaiy úndeý joldady. Ásirese Sháken Aimanov atyndaǵy "Qazaqfilm" kinostýdiiasyndaǵy jaǵdaiǵa qatysty qynjylys bildirildi, dep habarlaidy Dalanews.kz.
Uiymda aitylǵandai, kino salasyndaǵy júieli problemalardyń túp-tórkini – Mádeniet jáne aqparat ministrliginiń salǵyrttyǵynda jatyr.
"Sońǵy jyldary Mádeniet jáne aqparat ministrliginiń beijailyǵy men ar-uiattan jurdai basshylardyń kesirinen kinostýdiia ujymy túrli qysym men moraldyq zorlyqqa ushyrady. Al "Qazaqfilm" – búginde kinoqoǵamdastyq arasynda ashyq talqylanyp júrgen, tolastamaityn daý-damai men narazylyqtyń ordasyna ainaldy", – dedi Qazaqstan kinematografister odaǵynyń tóraǵasy Adai Ábeldinov.
Synnyń astynda ásirese stýdiia prezidentiniń mindetin atqarýshy Aidar Omarov qaldy. Oǵan memlekettik tildi elemeý, kásibi biliktiliktiń tómendigi jáne shyǵarmashylyq ortanyń irgesin shaiqatý sekildi aiyptar taǵylyp otyr.
Avtorlardyń aitýynsha, stýdiiada qyzmetkerlerge qysym kórsetý, shyǵarmashylyq protsesterge kedergi keltirý jáne óndiristik áleýettiń joiylýy beleń alǵan. Sonymen qatar kinogerler Mádeniet ministri Aida Balaevany bul máselelerge kóz juma qarap, kásibi qaýymdastyqpen bailanys ornatýdan bas tartty dep aiyptady.
"Osyndai jaýapsyzdyqtyń saldarynan kino salasynda jemqorlyq órship, memleket bólgen milliardtaǵan qarjy maqsatsyz jumsalýda. Tártip ornatýdy talap etken kásibi jáne adal kinematografister arsyz ári qatygez basshylar tarapynan qýdalaýǵa ushyrap, "Qazaqfilmnen" yǵystyrylyp jatyr", – delingen úndeýde.
Kinematografister bilik ókilderimen tikelei kezdesý ótkizýdi talap etip, "Qazaqfilm" stýdiiasyna arnaiy sapar uiymdastyryp, ondaǵy naqty jaǵdaimen tanysýdy usyndy.
