قازاقستان كينەماتوگرافيستەر وداعى ۇلتتىق كينووندىرىستىڭ قازىرگى احۋالىنا الاڭداۋشىلىق ءبىلدىرىپ، بيلىككە ارنايى ۇندەۋ جولدادى. اسىرەسە شاكەن ايمانوۆ اتىنداعى "قازاقفيلم" كينوستۋدياسىنداعى جاعدايعا قاتىستى قىنجىلىس ءبىلدىرىلدى، دەپ حابارلايدى Dalanews.kz.
ۇيىمدا ايتىلعانداي، كينو سالاسىنداعى جۇيەلى پروبلەمالاردىڭ تۇپ-توركىنى – مادەنيەت جانە اقپارات مينيسترلىگىنىڭ سالعىرتتىعىندا جاتىر.
"سوڭعى جىلدارى مادەنيەت جانە اقپارات مينيسترلىگىنىڭ بەيجايلىعى مەن ار-ۇياتتان جۇرداي باسشىلاردىڭ كەسىرىنەن كينوستۋديا ۇجىمى ءتۇرلى قىسىم مەن مورالدىق زورلىققا ۇشىرادى. ال "قازاقفيلم" – بۇگىندە كينوقوعامداستىق اراسىندا اشىق تالقىلانىپ جۇرگەن، تولاستامايتىن داۋ-داماي مەن نارازىلىقتىڭ ورداسىنا اينالدى"، – دەدى قازاقستان كينەماتوگرافيستەر وداعىنىڭ ءتوراعاسى اداي ابەلدينوۆ.
سىننىڭ استىندا اسىرەسە ستۋديا پرەزيدەنتىنىڭ مىندەتىن اتقارۋشى ايدار وماروۆ قالدى. وعان مەملەكەتتىك ءتىلدى ەلەمەۋ، كاسىبي بىلىكتىلىكتىڭ تومەندىگى جانە شىعارماشىلىق ورتانىڭ ىرگەسىن شايقاتۋ سەكىلدى ايىپتار تاعىلىپ وتىر.
اۆتورلاردىڭ ايتۋىنشا، ستۋديادا قىزمەتكەرلەرگە قىسىم كورسەتۋ، شىعارماشىلىق پروسەستەرگە كەدەرگى كەلتىرۋ جانە وندىرىستىك الەۋەتتىڭ جويىلۋى بەلەڭ العان. سونىمەن قاتار كينوگەرلەر مادەنيەت ءمينيسترى ايدا بالايەۆانى بۇل ماسەلەلەرگە كوز جۇما قاراپ، كاسىبي قاۋىمداستىقپەن بايلانىس ورناتۋدان باس تارتتى دەپ ايىپتادى.
"وسىنداي جاۋاپسىزدىقتىڭ سالدارىنان كينو سالاسىندا جەمقورلىق ءورشىپ، مەملەكەت بولگەن ميللياردتاعان قارجى ماقساتسىز جۇمسالۋدا. ءتارتىپ ورناتۋدى تالاپ ەتكەن كاسىبي جانە ادال كينەماتوگرافيستەر ارسىز ءارى قاتىگەز باسشىلار تاراپىنان قۋدالاۋعا ۇشىراپ، "قازاقفيلمنەن" ىعىستىرىلىپ جاتىر"، – دەلىنگەن ۇندەۋدە.
كينەماتوگرافيستەر بيلىك وكىلدەرىمەن تىكەلەي كەزدەسۋ وتكىزۋدى تالاپ ەتىپ، "قازاقفيلم" ستۋدياسىنا ارنايى ساپار ۇيىمداستىرىپ، ونداعى ناقتى جاعدايمەن تانىسۋدى ۇسىندى.
