QR Premer-ministri Oljas Bektenov Úkimette 2025 jylǵy 15 shildede ótken baspasóz máslihatynda ulttyq valiýtanyń yqtimal devalvatsiiasyna qatysty ózine qoiylǵan suraqqa jaýap berdi, dep habarlaidy Dalanews.kz.
"Kúzde 1 AQSh dollarynyń quny 600 teńge bolýy múmkin. Keibir sarapshylar osyndai boljam jasap júr. Buǵan qatysty Sizdiń oiyńyz qandai, jalpy Úkimet 2026 jylǵa arnalǵan biýdjetti qalyptastyrý kezinde valiýta baǵamy men jalpy munai baǵasyna qatysty qandai tsifrlarǵa súienedi". Búgin, 2025 jyly 15 shildede ótken Úkimet otyrysynan keiin ótken brifing barysynda jýrnalisterdiń biri Úkimet basshysyna osyndai suraq qoidy.
Oljas Bektenov Qazaqstanda dollar baǵamy naryqtyq faktorlar negizinde qalyptasatynyn, oǵan Ulttyq Bank aralaspaitynyn eske saldy.
"Búgingi tańda bizdiń jáne kóptegen sarapshylardyń baǵalaýy boiynsha teńge baǵamynyń kúrt álsireýin tanytatyn alǵysharttar bilinbeidi. Sondyqtan alda devalvatsiia bolyp, ulttyq valiýta baǵamy kúrt álsireidi dep kútilmeidi", - dedi Úkimet basshysy.
Onyń aitýynsha, biýdjetti qalyptastyrý kezinde úkimet munaidyń bir barreliniń baǵasy 60 dollar bolǵanda 1 AQSh dolarynyń quny 540 teńgege bolady degen bazalyq stsenariidi negizge alady.
"Bul - negizgi stsenarii. Pessimistik stsenarii degen de bar, eger kenetten munai baǵasy 50 barrelge deiin tómendese, onda basqa tetikter qarastyrylady. Biraq biz negizgi stsenarii búgingi tańda shynaiy qalypqa ie dep sanaimyz", - dep atap ótti Bektenov.
Buǵan deiin Ulttyq Bank tóraǵasy Timýr Súleimenov teńgeniń álsireýine ne sebep bolǵanyn aityp bergen edi.
