"Kúnine 80-100 adam qaitys bolady". DenSaýMin ókili professor Sharmannyń boljamyna qatysty pikir bildirdi
Koronavirýstan qarasha aiynyń basynda kúnine 80-100 adam qaitys bolady. Sondyqtan, qoldaǵy bar resýrsty sozylmaly aýrýy bar adamdarǵa jumsaý kerek. Áleýmettik jelide jeldei esken virýsolog-ǵalym, meditsina doktory Almaz Sharmannyń bul aitqany kez kelgen adamdy shoshytqany ras. Ministrliktiń resmi ókili Baǵdat Qojahmetov buǵan pikir bildirdi.
Baǵdat QOJAHMETOV, QR DENSAÝLYQ SAQTAÝ MINISTRLIGINIŃ RESMI ÓKILI:
- Kez kelgen jaǵdaida boljamdardyń oryndalýy, oryndalmaýy ol álde qaida, qalai bolatyny belgisiz. Sondyqtan eń bastysy densaýlyq saqtaý júiesin daiyndap, mundai boljamdy bul ómirde iske asyrmaý kerek.
Sondai-aq, balalar dárigerleri ata-analardy sabyrǵa shaqyrdy. Olar qytailyq indetpen qatar balalar arasynda taraǵan "Kavasaki" sindromyn jappai juqtyrý el aýmaǵynda bolǵan joq dedi.
Riza BORANBAEVA, "PEDIATRIIa JÁNE BALALAR HIRÝRGIIaSY ǴYLYMI ORTALYǴY" AQ BASQARMA TÓRAIYMY:
- Búgingi kúnge deiin respýblikada balalar arasynda koronavirýstyń 2500-dei jaǵdaiy tirkelip otyr, 111 derek jasqa tolmaǵan sábiler arasynda anyqtaldy. Onyń qazir 52-si emdelýde. Al sonyń ishinde 16 baladan Kavasaki sindromy boldy. Olardyń ishinde 8 bala emdelip shyqty. Qalǵan naýqastar kópsalaly balalar aýrýhanalarynda em alyp jatyr. Aýrý anyqtalǵan kezinde ýaqytyly gospitalizatsiiadan ótse, emdelip ketedi.
Biyl ata-analardyń ótinishi boiynsha, 1-4 synyp oqýshylary úshin mektepterde kezekshi toptar ashylmaq. Biraq, balalar meditsinalyq maska taǵýy mindettelip otyr. Al betperdege ata-ana jaýapty bolmaq.
Baǵdat QOJAHMETOV, QR DENSAÝLYQ SAQTAÝ MINISTRLIGINIŃ RESMI ÓKILI:
- Qazaqstandaǵy mektepterge baratyn oqýshylar qolyna qolǵap kiiý mindetti emes. Tek betperdeni kiiýge mindetti. Bul betperdelermen áke-shesheleri qamtý kerek.
COVID-19-dy álem boiynsha 23,6 million adam juqtyrypty. Eldegi ahýlaǵa kelsek, koronavirýs indeti ótken táýlikte 175 adamnan anyqtalǵan. Osylaisha jalpy naýqastardyń sany - 104 myńnan asty. Onyń 88 paiyzy emdelip shyqty. Ókinishke qarai, 1523 adam baqilyq boldy. Al, KVI anyqtalmaǵan, aýrý belgileri bar pnevmoniiaǵa shaldyqqandar 22 myńnan asty. 4 jarym myń azamat aýrýdan aiyǵypty. Ókpe qabynýynan 258 ólim deregi tirkeldi.
https://youtu.be/FqKJGo1apUs
