Quryltai ǵimaratynda BAQ ókilderiniń depýtattarmen jumys isteý tártibi ózgerdi. Budan bylai jýrnalister halyq qalaýlylaryna saýaldaryn kýlýarda emes, tek arnaiy baspasóz ortalyǵynda qoia alady. Bul sheshim qanshalyqty oryndy? “Ádil sóz” halyqaralyq sóz bostandyǵyn qorǵaý qorynyń zańgeri Sergei Ýtkin atalǵan máselege qatysty Dalanews.kz redaktsiiasyna pikir bildirdi.
Onyń aitýynsha, aldymen Quryltaidy kýlýarsyz ótkizý týraly sheshimniń qandai negizde qabyldanǵanyn anyqtaý kerek.
“Mass-media týraly” zańnyń 26-babyna sáikes, jýrnalister asa mańyzdy memlekettik jáne strategiialyq nysandarǵa barǵan kezde sol jerde belgilengen ótkizý jáne ishki tártip talaptaryn saqtaýǵa mindetti. Sondyqtan jýrnalister Quryltai ótetin nysannyń ishki tártip erejelerin suratýy kerek. Jýrnalister úshin tiisti shekteýler dál osy qaǵidalarda kózdelýi múmkin. Eger kýlýar ótkizýge tyiym salý jáne jýrnalisterdiń oǵan qatysýyn shekteý erejelerde nemese basqa zańdy negizde kózdelmese, mundai sheshimniń zańdylyǵyna qatysty suraq týyndaidy”, – dedi Sergei Ýtkin.
Zańgerdiń aitýynsha, Quryltaidy kýlýarsyz ótkizýge qandai zań nemese ereje negiz bolǵanyn uiymdastyrýshylar resmi túrde túsindirýi tiis.
“Quryltai uiymdastyrýshylarynan is-sharany kýlýarsyz ótkizý týraly sheshimniń quqyqtyq negizin suratýdy usynamyz”, - dedi ol.
Buǵan deiin
Aita keteiik, buǵan deiin Quryltai ǵimaratynda jýrnalister úshin dástúrli kýlýar uiymdastyrylmaityny habarlanǵan edi.
Jańa erejege sáikes, zań shyǵarýshy organ ǵimaratyndaǵy dástúrli kýlýarlyq suhbattar ótkizilmeidi.
Kýlýarlar jýrnalister úshin mańyzdy quraldardyń biri sanalady. Óitkeni olar depýtattarmen resmi formattan tys tikelei sóilesýge múmkindik beredi. BAQ ókilderi otyrys bastalar aldynda nemese aiaqtalǵannan keiin depýtattarǵa jedel suraq qoiyp, aitylǵan pikirlerdi naqtylap, resmi kún tártibine enbegen máseleler boiynsha kózqarasyn bile alady.
Sondai-aq dál kýlýarlarda qoǵamda qyzý talqylanyp jatqan ózekti ári kúrdeli taqyryptarǵa qatysty pikirler jii aitylatyn. Mundai format depýtattar men jýrnalister arasyndaǵy jedel bailanysty qamtamasyz etip, qoǵamdy tolǵandyrǵan máseleler boiynsha qosymsha aqparat alýǵa múmkindik beretin.
Endi depýtattarmen suhbattasý jáne suraq qoiý jumystary tek Quryltaidyń baspasóz ortalyǵynda uiymdastyrylatyn bolady. Jańa tártiptiń jýrnalisterdiń aqparat alý múmkindigine qalai áser etetini ázirge belgisiz.
