Belgili qazaqstandyq saiasattanýshy Dosym Sátpaev reseilik telejúrgizýshi Tina Kandelakidiń Qazaqstanda orys tili “yǵysyp jatyr” degen sózine qatysty pikir bildirdi, dep habarlaidy Dalanews.kz.
Sátpaev Tina Kandelakidi “Kremldik nasihatshylar teatryndaǵy qýyrshaqtyń biri” ekenin málimdedi. Saiasattanýshynyń aitýynsha, ol “basqalar sekildi Resei biliginiń oiy men pikirin jetkizetin BAQ qýyrshaǵy”.
“2014 jyldan keiin jáne 2022 jylǵa deiin olar Qazaqstanǵa baǵyttalǵan arandatýshylyq sipattaǵy málimdemelerdi joldap keledi. Al bul Ýkrainadan keiingi nysana Qazaqstan bolady degen maqsatpen júrgizgen aqparattyq soǵystyń bir bóligi. 2022 jyldan bastap orys oraǵy ýkraindyq tasty tapqannan beri Qazaqstan Kreml úshin “sur importta” ári sanktsiialardy ainalyp ótýde basqatyrǵysh retinde mańyzdylyqqa ie boldy. Bizdiń EAEO jáne UQShU-da bolýymyz Reseidiń Qazaqstannyń táýelsizdigi men egemendigine únemi kúmán keltirýine alyp keledi. Sonymen qatar elimiz Reseidiń sanktsiialyq ekonomikasynyń qosymshasy ári qaýipsizdik salasynda Reseige táýeldi memleket retinde qarastyratyn reseilik úgit-nasihatqa da túrtki bolady”, - deidi Sátpaev.
Sátpaev Qazaqstandaǵy ulttyq sananyń ósýine bailanysty Resei biligi tarapynan “júike reaktsiiasy” bar ekenin aitty.
Bir kún buryn Májilis depýtattary reseilik telejúrgizýshi Tina Kandelakidiń Qazaqstanda orys tiliniń yǵysýyna qatysty málimdemesine memlekettik deńgeide jaýap berdi.
Eske salaiyq, buǵan deiin telejúrgizýshi Tina Kandelaki Qazaqstan “orys tilin memlekettik deńgeide baiaý, biraq senimdi túrde yǵystyryp jatyr” dep málimdegen bolatyn.
