"Reseige barlyq taýardy eksportqa shyǵaryp jatyrmyz. Tek soǵysqa qatysty eksporttyq taýarlardy shektei bastadyq. Bul — 106 alýan túrli taýar. Olardyń eksportyn tutas shektedik. Bular soǵysta tabylǵan taýarlar: dron ishinde tabylǵan zattar, arnaiy elektronika, chipter" dedi vitse-ministr.
Qairat Tórebaevtyń aitýynsha, shekteý qoiylǵan taýarlar Qazaqstanda óndirilmeidi, buryn el aýmaǵy arqyly eksportqa shyǵarylǵan.
Osyǵan deiin Reseige tyiym salynǵan taýarlardy jetkizdi dep kúdikke ilingen elder arasynda Qazaqstan da bolǵan.
Qyrkúiek aiynda Ýkrainadaǵy soǵysta paidalanylǵan irandyq "Shahed-131" dronynda Batysta shyǵarylǵan 52 komponent tabylǵany, ony óndirgen bólshekter Iranǵa Túrkiia, Úndistan, Qazaqstan, Ózbekstan, Vetnam jáne Kosta-Rika siiaqty úshinshi elder arqyly tasymaldanǵany habarlanǵan.
Izinshe Qazaqstan saýda ministrligi Qazaqstan Iranǵa dron bólshekterin tasymaldady degen aqparatty joqqa shyǵardy.
"Qandai komponentter týraly aitylǵany túsiniksiz. Taýarlar týraly tolyq aqparat berilse, Qazaqstannyń ýákiletti organdary taldaý júrgizip, barlyq qajet aqparatty berýge daiyn" delingen ministrliktiń Azattyqqa jaýabynda.
Qazaqstandyq sheneýnikter buǵan deiin Qazaqstan aýmaǵyn Reseige qarsy sanktsiiany ainalyp ótý alańyna ainalýyna jol bermeimiz dep málimdegen edi. Biyl kóktemde Qazaqstan biligi respýblika shekarasyn kesip ótetin barlyq taýardy tekserýge múmkindik beretin onlain-júieni iske qosqanyn habarlaǵan.
