"رەسەيگە بارلىق تاۋاردى ەكسپورتقا شىعارىپ جاتىرمىز. تەك سوعىسقا قاتىستى ەكسپورتتىق تاۋارلاردى شەكتەي باستادىق. بۇل — 106 الۋان ءتۇرلى تاۋار. ولاردىڭ ەكسپورتىن تۇتاس شەكتەدىك. بۇلار سوعىستا تابىلعان تاۋارلار: درون ىشىندە تابىلعان زاتتار، ارنايى ەلەكترونيكا، چيپتەر" دەدى ۆيسە-مينيستر.
قايرات تورەبايەۆتىڭ ايتۋىنشا، شەكتەۋ قويىلعان تاۋارلار قازاقستاندا وندىرىلمەيدى، بۇرىن ەل اۋماعى ارقىلى ەكسپورتقا شىعارىلعان.
وسىعان دەيىن رەسەيگە تىيىم سالىنعان تاۋارلاردى جەتكىزدى دەپ كۇدىككە ىلىنگەن ەلدەر اراسىندا قازاقستان دا بولعان.
قىركۇيەك ايىندا ۋكرايناداعى سوعىستا پايدالانىلعان يراندىق "شاحەد-131" درونىندا باتىستا شىعارىلعان 52 كومپونەنت تابىلعانى، ونى وندىرگەن بولشەكتەر يرانعا تۇركيا، ءۇندىستان، قازاقستان، وزبەكستان، ۆەتنام جانە كوستا-ريكا سياقتى ءۇشىنشى ەلدەر ارقىلى تاسىمالدانعانى حابارلانعان.
ىزىنشە قازاقستان ساۋدا مينيسترلىگى قازاقستان يرانعا درون بولشەكتەرىن تاسىمالدادى دەگەن اقپاراتتى جوققا شىعاردى.
"قانداي كومپونەنتتەر تۋرالى ايتىلعانى تۇسىنىكسىز. تاۋارلار تۋرالى تولىق اقپارات بەرىلسە، قازاقستاننىڭ ۋاكىلەتتى ورگاندارى تالداۋ جۇرگىزىپ، بارلىق قاجەت اقپاراتتى بەرۋگە دايىن" دەلىنگەن مينيسترلىكتىڭ ازاتتىققا جاۋابىندا.
قازاقستاندىق شەنەۋنىكتەر بۇعان دەيىن قازاقستان اۋماعىن رەسەيگە قارسى سانكسيانى اينالىپ ءوتۋ الاڭىنا اينالۋىنا جول بەرمەيمىز دەپ مالىمدەگەن ەدى. بيىل كوكتەمدە قازاقستان بيلىگى رەسپۋبليكا شەكاراسىن كەسىپ وتەتىن بارلىق تاۋاردى تەكسەرۋگە مۇمكىندىك بەرەتىن ونلاين-جۇيەنى ىسكە قوسقانىن حابارلاعان.
