Mundaı pikirdi Dýma komıteti TMD isteri, eýrazıalyq ıntegrasıa jáne otandastarmen baılanys jónindegi komıtet tóraǵasynyń birinshi orynbasary Vıktor Vodolaskıı aıtty, dep habarlaıdy Dalanews.kz TASS-qa silteme jasap.
Reseı Federasıasy Qazaqstan Respýblıkasynyń egemendigin belgilengen shekaralarda tanıdy. Eń bastysy, biz úshin Qazaqstan kóptegen kelisimderge, kelisimsharttarǵa qol qoıǵan dos memleket bolyp tabylady, - dep atap ótti ol.
Vodolaskıı Qazaqstannyń Ujymdyq qaýipsizdik sharty uıymy, Eýrazıalyq ekonomıkalyq odaq aıasyndaǵy birlesken baǵdarlamalarǵa qatysatynyn eske saldy.
"(Qazaqstan) - TMD aıasyndaǵy bizdiń eń belsendi seriktesimiz", - dedi ol.
- Sondyqtan, bul janjal sheshiledi dep oılaımyn, al saıasattanýshylarmen pikirtalas kezinde bolǵan oqıǵany (Nıkonovtyń qatysýymen) san-saqqa júgirtip, ártúrli talqylaýǵa bolady, - dep jalǵastyrdy óz oıyn reseılik depýtat.
Ol "tarıhı máselelerdi talqylaýda aıtqan sózinen Vácheslav Alekseevıch [Nıkonov] qandaı da bir saldar týýy múmkin dep oılamaǵan" degendi de aıtty.
- Menińshe, oqıǵa rettelip, túsinbestikter joıylady, - dep sózin túıindedi ol.
Buǵan deıin QR Syrtqy ister mınıstrligi Reseı Federasıasyna Nıkonovtyń málimdemelerine baılanysty nota tapsyrǵan bolatyn. Mınıstrliktiń baspasóz qyzmetiniń habarlaýynsha, QR Syrtqy ister mınıstriniń orynbasary Marat Syzdyqov Reseı Federasıasynyń ýaqytsha senimdi ókili Aleksandr Komarovpen kezdesý kezinde "Reseı Federasıasy Memlekettik Dýmasy Bilim jáne ǵylym komıtetiniń tóraǵasy Vácheslav Nıkonovtyń "Qazaqstan terıtorıasy - Reseıdiń [jáne Keńes Odaǵynyń] keremet syıy" dep, Birinshi telearnada aıtqan málimdemesine qatysty óz narazylyǵyn bildirdi. Qazaqstannyń syrtqy ister mınıstrligi keıbir reseılik saıasatkerlerdiń Qazaqstanǵa qarsy jıi-jıi arandatýshylyq sıpattaǵy aqparattyq shabýyldary memleketter arasyndaǵy odaqtastyq qatynastarǵa úlken zıan keltirip otyrǵanyn atap ótti.
Nıkonovtyń ózi senbi kúni Telegram-arnasynda "Qazaqstan Respýblıkasynyń shekarasyna aınalǵan Qazaq KSR-niń shekaralaryn anyqtaýda Qazaqstannyń múddeleri tolyǵymen saqtaldy" dep jazdy jáne ol "Bolshaıa ıgra" baǵdarlamasynda týra osyny aıtqanyn jetkizdi. Ol, sondaı-aq "baýyrlas Qazaqstan halqyna degen jyly iltıpatyn" bildirdi.
