– Bul zalda Úkimet pen prokýratýra ókilderi de otyr. Úkimettiń halyqqa nesie almaýǵa qatysty janashyrlyqpen keńes bergeni durys, biraq ash adam aqyldy tyńdaýshy ma edi? Aityńyzdarshy, qymbatshylyq alqymnan alyp, tunshyqtyrǵanda kim keńesti tyńdaidy? Sondyqtan halyqtan qaryz óndirý taqyrybyna qatysty myna máseleni kótergim keledi.
Kezinde bank sektoryn jaqsartamyz degen jeleýmen Ulttyq qordan trilliondaǵan teńge alynǵanyn bilemiz. Sony prokýratýranyń qazynaǵa qaitarýyn talap etemin!
Úkimetke aitarym, sizder halyqtyń qaryzyn emes, birneshe bankti biriktirip, qyrýar saýyqtyrý qarjysyn bir bankke jinastyryp, onyń barlyǵyn sypyryp-siyryp alyp ketken nazarbaevtyq oligarhtarǵa tiesili bankterdiń halyqqa qaryzyn nege izdemeisizder?
Halyqtan qaryzdy óndirip alǵansha, Nazarbaevtyń oligarhtaryna kómek retinde bólgen qarjyny óndirip alýymyz kerek, – dep Bapi suraqty tótesinen qoidy.
Depýtattyń pikirinshe, trilliondaǵan teńgeni qaitarsaq, onda halyqtyń barlyq nesiesin 20 ese jaýyp tastaýǵa bolady.
Munymen qosa Ermurat Bapi aktivterdi óndirip alý týraly zańnyń qalai oryndalyp jatqanyn surap, aktivterdi qaitarý jónindegi komissiianyń quramynda bolǵan azamattyq qoǵam ókilderiniń esimderin atady.
«Aktivterdi elge qaitaramyz dep zań qabyldadyq. Zań qalai oryndalyp jatyr? Ótkende ýákiletti organnyń qurylǵany habarlandy. Biraq ol habar mardymsyz boldy. Prezidenttiń tapsyrmasymen sol aktivterdi qaitarý komitetine 130 adam múshe bolǵan. Qazir 30-40 adam degen aqparat bar. Komitette naqty qansha adam bar? Komissiianyń quramynda azamattyq qoǵam ókilderinen kimder bar?» - dedi depýtat.
Bas prokýrordyń orynbasary Jandos Ómiraliev aktivterdi qaitarý jumystary retimen júrip jatqanyn, aldaǵy ýaqytta múlki tárkilengen tulǵalardyń tizimi jariia etiletinin aityp, sendirdi.
"Biyl 5 qazanda memleket basshysynyń Jarlyǵymen komitet quryldy. Onyń shtaty da bar. 900 mlrd-tan asa teńgeniń bárin memlekettiń paidasyna qaitardyq. Syrttan shamamen 600 mln dollar memleketke aýdaryldy. Aýqymdy jumys áli júrgizilip jatyr. Onyń ishinde kóptegen jer qaitaryldy.
Árine, komissiianyń naqty quramy bar. Oǵan Parlament depýtattary jáne qoǵamdyq belsendi azamattar kirdi. Olardyń aty-jónin sizge jeke beremin. Komitettiń reestrine naqty qandai tulǵalardyń kirgenine qatysty másele áli jabyq. Biraq bul jumys júrgizilip jatyr. Biraq búgingi reglamentti saqtaý úshin sizben jeke kezdesip, másele boiynsha tolyq habar berýge daiynmyn", - dedi ol.
