Ýkraina Syrtqy ister ministrligi Kaspii qubyr konsortsiýmynyń (KQK) infraqurylymyna jasalǵan sońǵy shabýyldarǵa qatysty el ustanymyn túsindiretin baspasóz qyzmetiniń jetekshisi Georgii Tihiidiń pikirin jariialady, dep habarlaidy Dalanews.kz.
"Ýkraina Kaspii qubyr konsortsiýynyń infraqurylymyna qatysty Qazaqstan Respýblikasynyń alańdaýshylyǵyn eskerdi. Aita ketemiz, ýkrain tarapynan jasalǵan eshbir áreket Qazaqstan Respýblikasyna nemese basqa úshinshi elderge baǵyttalmaǵan, Ýkrainanyń barlyq kúsh-qýaty BUU Jarǵysynyń 51-babynda kózdelgen ózin-ózi qorǵaý quqyǵy aiasynda Reseidiń keń aýqymdy agressiiasyna qarsy turýǵa baǵyttalǵan", – delingen Georgii Tihiidiń habarlamasynda.
Sonymen qatar, málimdemede Ýkrainanyń Qorǵanys kúshteri agressordyń áskeri-ónerkásiptik áleýetin júieli túrde álsiretip, onyń basqynshylyq soǵysty jalǵastyrýyna jáne halqymyzdy qyrýyna múmkindik beretin resýrstarynan aiyryp kelgeni atap ótilgen.
"Ýkraina agressordyń soqqylary men shabýyldaryna jaýap beredi", – dep kórsetilgen.
Georgii Tihii Qara teńiz óńirindegi jáne onyń sheginen tys aýmaqtaǵy turaqsyzdyqqa sebep bolyp otyrǵan jalǵyz faktor — Resei agressiiasy ekenin atap ótken.
"Búgingi týyndaǵan alańdaýshylyq aiasynda qazaq tarapynan osyǵan deiin Reseidiń Ýkrainadaǵy beibit turǵyndarǵa, turǵyn úilerge, azamattyq infraqurylymǵa jáne elimizdiń energetikalyq júiesine, ásirese ýkrain atom elektr stantsiialarynyń qosalqy stantsiialaryna jasalǵan soqqylaryn aiyptaǵan málimdemelerdiń bolmaǵanyna nazar aýdaramyz", – delingen Tihiidiń túsiniktemesinde.
Ýkraina Syrtqy ister ministrligi barlyq tarapty soǵysty toqtatýǵa baǵyttalǵan sharalarǵa kúsh salýǵa shaqyrdy.
Eske sala keteiik, buǵan deiin Reseide qazaq munaiy eksporttalatyn konsortsiýmǵa shabýyl jasalǵany habarlanǵan bolatyn. 29 qarasha tańerteń Kaspii Qubyr Konsortsiýmynyń (KQK) Teńiz terminaly akvatoriiasyna ekipajsyz jyldam júretin katerler shabýyl jasady. Konsortsiým málimetinshe, sonyń saldarynan VPÝ-2 dep atalatyn alysta ornalasqan ailaq qurylǵysy eleýli zaqymdalǵan.
