ۋكراينا سىرتقى ىستەر مينيسترلىگى كاسپيي قۇبىر كونسورسيۋمىنىڭ (كقك) ينفراقۇرىلىمىنا جاسالعان سوڭعى شابۋىلدارعا قاتىستى ەل ۇستانىمىن تۇسىندىرەتىن باسپا ءسوز قىزمەتىنىڭ جەتەكشىسى گەورگيي ءتيحييدىڭ پىكىرىن جاريالادى، دەپ حابارلايدى Dalanews.kz.
"ۋكراينا كاسپيي قۇبىر كونسورسيۋىنىڭ ينفراقۇرىلىمىنا قاتىستى قازاقستان رەسپۋبليكاسىنىڭ الاڭداۋشىلىعىن ەسكەردى. ايتا كەتەمىز، ۋكراين تاراپىنان جاسالعان ەشبىر ارەكەت قازاقستان رەسپۋبليكاسىنا نەمەسە باسقا ءۇشىنشى ەلدەرگە باعىتتالماعان، ۋكراينانىڭ بارلىق كۇش-قۋاتى بۇۇ جارعىسىنىڭ 51-بابىندا كوزدەلگەن ءوزىن-وزى قورعاۋ قۇقىعى اياسىندا رەسەيدىڭ كەڭ اۋقىمدى اگرەسسياسىنا قارسى تۇرۋعا باعىتتالعان"، – دەلىنگەن گەورگيي ءتيحييدىڭ حابارلاماسىندا.
سونىمەن قاتار، مالىمدەمەدە ۋكراينانىڭ قورعانىس كۇشتەرى اگرەسسوردىڭ اسكەري-ونەركاسىپتىك الەۋەتىن جۇيەلى تۇردە السىرەتىپ، ونىڭ باسقىنشىلىق سوعىستى جالعاستىرۋىنا جانە حالقىمىزدى قىرۋىنا مۇمكىندىك بەرەتىن رەسۋرستارىنان ايىرىپ كەلگەنى اتاپ وتىلگەن.
"ۋكراينا اگرەسسوردىڭ سوققىلارى مەن شابۋىلدارىنا جاۋاپ بەرەدى"، – دەپ كورسەتىلگەن.
گەورگيي تيحيي قارا تەڭىز وڭىرىندەگى جانە ونىڭ شەگىنەن تىس اۋماقتاعى تۇراقسىزدىققا سەبەپ بولىپ وتىرعان جالعىز فاكتور — رەسەي اگرەسسياسى ەكەنىن اتاپ وتكەن.
"بۇگىنگى تۋىنداعان الاڭداۋشىلىق اياسىندا قازاق تاراپىنان وسىعان دەيىن رەسەيدىڭ ۋكرايناداعى بەيبىت تۇرعىندارعا، تۇرعىن ۇيلەرگە، ازاماتتىق ينفراقۇرىلىمعا جانە ەلىمىزدىڭ ەنەرگەتيكالىق جۇيەسىنە، اسىرەسە ۋكراين اتوم ەلەكتر ستانسيالارىنىڭ قوسالقى ستانسيالارىنا جاسالعان سوققىلارىن ايىپتاعان مالىمدەمەلەردىڭ بولماعانىنا نازار اۋدارامىز"، – دەلىنگەن ءتيحييدىڭ تۇسىنىكتەمەسىندە.
ۋكراينا سىرتقى ىستەر مينيسترلىگى بارلىق تاراپتى سوعىستى توقتاتۋعا باعىتتالعان شارالارعا كۇش سالۋعا شاقىردى.
ەسكە سالا كەتەيىك، بۇعان دەيىن رەسەيدە قازاق مۇنايى ەكسپورتتالاتىن كونسورسيۋمعا شابۋىل جاسالعانى حابارلانعان بولاتىن. 29 قاراشا تاڭەرتەڭ كاسپيي قۇبىر كونسورسيۋمىنىڭ (كقك) تەڭىز تەرمينالى اكۆاتورياسىنا ەكيپاجسىز جىلدام جۇرەتىن كاتەرلەر شابۋىل جاسادى. كونسورسيۋم مالىمەتىنشە، سونىڭ سالدارىنان ۆپۋ-2 دەپ اتالاتىن الىستا ورنالاسقان ايلاق قۇرىلعىسى ەلەۋلى زاقىمدالعان.
