29 қараша таңертең Каспий Құбыр Консорциумының (КҚК) Теңіз терминалы акваториясына экипажсыз жылдам жүретін катерлер шабуыл жасады. Консорциум мәліметінше, соның салдарынан ВПУ-2 деп аталатын алыста орналасқан айлақ құрылғысы елеулі зақым алған, деп хабарлайды Dalanews.kz.
Новороссийск порт капитанының бұйрығымен барлық операциялар тоқтатылды, танкерлер акваториядан шығарылды. Зардап шеккендер жоқ. Апаттық қауіпсіздік жүйелері құбырларды автоматты түрде жауып тастаған, алдын ала мәлімет бойынша мұнайдың төгілуі анықталған жоқ. Қазір су сынамалары алынуда және экологиялық мониторинг жүргізіліп жатыр.
КҚК өкілдері ВПУ-2 құрылғысын әрі қарай пайдалануға болмайтынын мәлімдеді. Жүк тиеу жұмыстары БЭК пен БПЛА тарапынан қауіп толық жойылғаннан кейін ғана қайта басталады.
Консорциум бұл оқиғаны өзінің азаматтық нысандарына жасалған үшінші шабуыл деп атап, оны КҚК-ға қатысушы елдердің мүдделеріне бағытталған соққы деп бағалады.
КҚК Теңіз, Қашаған және Қарашығанақ кен орындарының мұнайын тасымалдайды; 2024 жылы тиеп-түсіру көлемі шамамен 63 млн тоннаны құрады, оның 74 пайызы шетелдік жүк.
