29 قاراشا تاڭەرتەڭ كاسپيي قۇبىر كونسورسيۋمىنىڭ (كقك) تەڭىز تەرمينالى اكۆاتورياسىنا ەكيپاجسىز جىلدام جۇرەتىن كاتەرلەر شابۋىل جاسادى. كونسورسيۋم مالىمەتىنشە، سونىڭ سالدارىنان ۆپۋ-2 دەپ اتالاتىن الىستا ورنالاسقان ايلاق قۇرىلعىسى ەلەۋلى زاقىم العان، دەپ حابارلايدى Dalanews.kz.
نوۆوروسسييسك پورت كاپيتانىنىڭ بۇيرىعىمەن بارلىق وپەراسيالار توقتاتىلدى، تانكەرلەر اكۆاتوريادان شىعارىلدى. زارداپ شەككەندەر جوق. اپاتتىق قاۋىپسىزدىك جۇيەلەرى قۇبىرلاردى اۆتوماتتى تۇردە جاۋىپ تاستاعان، الدىن الا مالىمەت بويىنشا مۇنايدىڭ توگىلۋى انىقتالعان جوق. ءقازىر سۋ سىنامالارى الىنۋدا جانە ەكولوگيالىق مونيتورينگ جۇرگىزىلىپ جاتىر.
كقك وكىلدەرى ۆپۋ-2 قۇرىلعىسىن ءارى قاراي پايدالانۋعا بولمايتىنىن مالىمدەدى. جۇك تيەۋ جۇمىستارى بەك پەن بپلا تاراپىنان ءقاۋىپ تولىق جويىلعاننان كەيىن عانا قايتا باستالادى.
كونسورسيۋم بۇل وقيعانى ءوزىنىڭ ازاماتتىق نىساندارىنا جاسالعان ءۇشىنشى شابۋىل دەپ اتاپ، ونى كقك-عا قاتىسۋشى ەلدەردىڭ مۇددەلەرىنە باعىتتالعان سوققى دەپ باعالادى.
كقك تەڭىز، قاشاعان جانە قاراشىعاناق كەن ورىندارىنىڭ مۇنايىن تاسىمالدايدى؛ 2024 جىلى تيەپ-تۇسىرۋ كولەمى شامامەن 63 ملن توننانى قۇرادى، ونىڭ 74 پايىزى شەتەلدىك جۇك.
